ABŞ-yə köçən Elariz Məmmədoğlu taksi fəaliyyəti ilə məşğul olur?

"Mən 4 il, 4 aydır ki, Azərbaycanda deyiləm. Əlbəttə ki, respublikam və millətim üçün çox darıxıram. Azərbaycanda mənim varlığıma və sənətimə hər zaman diqqət olub. Hər zaman konsertlərə, toylara, şoulara dəvət almışam. Hər an millətim, respublikam, qohumlarım, dostlarım və sənət yoldaşlarım fikrimdədir. Mən ölkəni tərk etməmişəm. Sadəcə "green card” lotereyanı qazandım və bu şansdan istifadə etdim. Ürəyim hər an Bakı ilədir”.

Den.az xəbər verir ki, bunu Moderator.az-a açıqlamasında ABŞ-də yaşayan müğənni Elariz Məmmədoğlu deyib.

"Hər dəfə ayağa qalxıram ki, Bakıya gedim, tərslikdən ayrı-ayrı ştatlardan 10-12 toy gəlir, mən də təyyarəyə minib, işimin arxasınca gedirəm. Mənim xoşbəxtliyim ondadır ki, ABŞ-də da öz işimlə məşğulam. Hər dəfə sənətimlə müvəffəqiyyət qazananda oxuduğum 16 nömrəli musiqi məktəbini, həmin məktəbdə solisti olduğum xor dərnəyini, vokal dərsi aldığım müəllimləri, Mədəniyyət və İncəsənət Universitetini, aktyor-rejissor pedaqoqlarımı, Hüseyn Cavid adına 132 nömrəli məktəbin müəllimlərini, idmanla məşğul olduğum OİK-i, İçərişəhərin küçələrini minnətdarlıq hissi ilə xatırlayıram. ABŞ-də Azərbaycan dilində mahnılarımı oxuyanda ingilislər də rəqs edirlər. Çünki, musiqinin dili yoxdur. Yeni gəlmişdim, restoranda "Azəri torpağı” mahnısını ifa edirdim. Bir də gördüm ki, azərbaycanlılarla bərabər, həm də xaricilər rəqs edirlər. Bundan böyük xoşbəxtlik ola bilərmi?”, - deyə sənətçi bildirib.

Müğənni "Elariz ABŞ-də taksi fəaliyyəti ilə məşğuldur” başlıqlı çıxan xəbərlərə də münasibət bildirib.

"2023-cü ilin əvvəlindən mənim "ABŞ-dən salam” adlı albomum çıxıb. Əgər taksi fəaliyyəti ilə məşğul olsaydım, ən azı 10 mahnını yazdıra bilərdim?! Sensasiya xatirinə yazılan yazıları bəzi sayt müxbirləri çörək qazanmaq üçün edirlər. Eybi yox, təki mənim adımla ailələrinə ruzi aparsınlar. Axı onların da yaşamaq haqqı var”, - deyə sənətçi deyib.

Elariz Məmmədoğlu bildirib ki, tək həyat yoldaşı ilə ABŞ-yə gedib.

"Mənə elə gəlir ki, ABŞ-də məni gözləyirdilər. "Green card” qazandığımı bilən dostlarım o dəqiqə zəng edib dedilər ki, "gəl biz səni burada necə lazımdır qarşılayacağıq”. Sağ olsunlar, onların hamısına təşəkkür edirəm. 21 yaşa qədər düşür övladla ABŞ-yə gəlmək. Mənim böyük övladımın 31, oğlumun 29, digər oğlumun isə 26 yaşı var. Heç biri ilə gəlməmişəm. Tək həyat yoldaşımla gəlmişəm. 4 nəvəm var, onlar üçün çox darıxıram. 4-cü nəvəm ABŞ-də olanda dünyaya gəlib. Sosial şəbəkələrdə çox yazıb, soruşurlar ki, "biz necə gələk?”. Deyirəm ki, "green card” udun, gəlin”, - deyə müğənni bildirib.