Belarus prezidenti Aleksandr Lukaşenko yenidən bəyan edib ki, ölkə Ukrayna qaçqınlarını məmnuniyyətlə qəbul edəcək və onların Belarusu “cənnət kimi yer” hesab edəcəyini bildirib. Bu açıqlamanı o, Jitkoviç rayonuna səfəri zamanı səsləndirib, DenMedia.az “Belarus 1” telekanalına istinadən xəbər verir.
“Ukraynalılar bizə gəlsələr, bu, bir nemətdir. Axı ukraynalılar bizim xalqımızdır,” — deyə Lukaşenko dövlət rəsmiləri ilə görüşdə söyləyib.
Prezident eyni zamanda əlavə edib ki, “artıq ora (Ukraynaya) baxanda, buraya gələcək kimsə qalmayıb.”
“Ukraynalılar üçün hətta bizim aqroşəhərciklərimizdə yaşamaq da cənnətdir,” — deyə o qeyd edib.
Lukaşenkonun sözlərinə görə, Ukrayna xalqı zəhmətkeş və ölkəsi çox varlıdır, lakin hakimiyyət bu xalqı elə vəziyyətə salıb ki, indi onlar Belarusa gələndə sevinirlər.
“Əlbəttə, cənnətdir: təhsil pulsuz, səhiyyə pulsuz, iş tapmaq — heç bir problem yoxdur,” — deyə Belarus lideri əlavə edib.
