Elmar Vəliyevin milyonluq obyektinin üzərinə həbs qoyuldu

Gəncənin keçmiş icra başçısı Elmar Vəliyevin oğluna məxsus şirkət məhkəməlik olub. 

Den.az-ın əldə etdiyi məlumata görə, Nərimanov Rayon Məhkəməsində 2009-cu ildə “Delfin” MMC-nin mülkiyyətinə verilmiş və Yevlax şəhərində yerləşən 2 ha torpaq sahəsi ilə bağlı müvəqqəti təminat tədbiri barədə ərizəyə baxılıb.
Zərifə Səfərova ərizə təqdim edərək həyat yoldaşı ilə birgə nikah dövründə əldə edilmiş mülkiyyət üzərində hüquqlarının bərpa edilməsini tələb edib.

O bildirib ki, həyat yoldaşı 2009-cu ildə ondan xəbərsiz və rəsmi icazəsi olmadan milyonlarla manat dəyəri olan mülkiyyəti qanunsuz olaraq Elmir Vəliyevin təsisçisi olduğu “Delfin” MMC-nin adına keçirib: “Həyat yoldaşım Mətləb Səfərovla birgə nikah dövründə əldə edilmiş əmlak həmin vaxt Yevlaxın icra başçısı olan Elmar Vəliyevin təzyiqi ilə həyat yoldaşım tərəfindən alq-satqı müqaviləsi əsasında qanunsuz şəkildə “Delfin” MMC-nin adına keçirilib. Həmin alqı-satqıdan bu ilədək mənim məlumatım olmayıb və əmlakın satılması ilə bağlı hər hansı razılığım olmayıb. Sonradan alqı-satqı müqaviləsi ilə tanış olduqda 2 ha torpaq sahəsinin 2500 manata satılması məlum oldu. Əslində isə Yevlax şəhəri ərazisində 2 hektar torpaq sahəsinin real bazar və satış dəyərinin 2500 manat olması ağlabatan deyil. Həmin torpaq sahəsinin özgəninkiləşdirilməsi və ya girova qoyulması ehtimalı olduğundan, gələcəkdə iddianın təmini baxımından çətinliklər yarana biləcəyindən mülkiyyət üzərinə həbsin qoyulması zəruridir”.

Hakim Aytən Novruzovanın sədrliyi ilə keçirilən iclasda Z.Səfərovanın mülki iddiasını təmin edib. “Delfin” MMC-yə torpaq sahəsinin özgəninkiləşdirilməsi qadağan edilib. Z.Səfərovanın qeyd edilən torpaq sahəsi üzrə mülkiyyət hüququnun bərpa edilməsi ilə bağlı mülki iddiasına isə iyunun 20-də baxılacaq. Qeyd edək ki, “Delfin” MMC-nin rəhbəri Elmir Vəliyev Yevlax RİH-in sabiq başçısı, sonradan Gəncə ŞİH-in başçısı olmuş Elmar Vəliyevin oğludur.