Türkiyə İsrailə qarşı: Ərdoğanın "Polad Qübbə" mesajının PƏRDƏARXASI

"İsrailin “Dəmir Günbəz”i var, Türkiyənin isə “Polad Qübbə”si olacaq”. Türkiyə prezidenti Rəcəb Tayyib Ərdoğanın bu fikirləri əməlli-başlı səs-küy yaradıb. O, Türkiyədə yeni “Polad Qübbə” hava hücumundan müdafiə sistemi yaradılacağını bildirib. Maraqlı məqam, Ərdoğanın Türkiyənin bu uğurunu İsraillə müqayisə etməsidir. Belə ki, bir çox analitiklər Türkiyə liderinin İsrailin adını çəkməklə Netanyahu hökumətinə xüsusi mesajlar verdiyi qənaətindədirlər. Bəs görəsən, bu sistemin yaradılması Türkiyənin hərbi sənayesinə nə kimi töhfələr verəcək?

Mövzunu "Den.az"a şərh edən politoloq Tural İsmayılov bildirib ki, bu gün Türkiyə və İsrail aktiv şəkildə qarşılıqlı savaş vəziyyətində deyil:

"Təbii ki, müəyyən səbəblərə və siyasi maraqlara görə İsraillə Türkiyə arasında ziddiyyətlər kəskinləşib. Amma burada dövlətlərarası aktiv müharibə vəziyyətindən söhbət getmir. Digər tərəfdən, bəzi İsrail siyasətçiləri Türkiyə ilə bağlı açıqlamalarında çərçivəni aşırlar. Bu baxımdan Ərdoğan sözügedən məsələdə mövqe bildirərkən Türkiyənin müdafiə sənayesi imkanlarını xatırladıb. təbii ki, bu gün Türkiyə təkcə PUA və qırıcı təyyarələrini təkmilləşdirməklə kifayətlənmir, həm də hava hücumundan müdafiə sistemlərini yaratmağa çalışır. Ərdoğanın açıqlaması göstərir ki, Türkiyə yaxın gələcəkdə hərbi sənaye məhsullarının çoxçeşidli formalarını yaradacaq. Eyni zamanda bu sistemin yaradılması Türkiyə hərbi sənayesini daha da müstəqilləşdirəcək. Onsuz da bu gün Türkiyə insansız hava silahlarında liderliyi ələ alıb və heç bir ölkədən asılı vəziyyətdə deyil. Ankara yaxşı anlayır ki, onun qlobal siyasi mövqelərinin güclənməsi dünyadakı bir çox imperialist və anti-Türk qüvvələrini narahat edir. Ona görə də, Türkiyə hərbi sənaye məhsullarının digər sahələrində də öz imkanlarını və potensialını dərinləşdirməyə çalışır. Bu baxımdan Türkiyənin "Polad Qübbə" ilə bağlı ortaya qoyduğu mövqe onu göstərir ki, Yaxın günlərdə çox möhtəşəm yeniliklər həyata keçiriləcək".

Günəş Fərəh
Den.az