“Qazaxıstan höküməti qanvermə məntəqələrinə gedən taksiləri pulsuz edib ki...” - FOTO

“Bu faciənin dərin kədər və acı ilə dolu olduğu bu günlərdə birlikdə olmağın, bir-birimizi dəstəkləməyin əhəmiyyətini bir daha dərk edirik. Əvvəlcə bu dəhşətli qəzada həyatlarını itirənlərin yaxınlarına və ailələrinə dərin hüznlə başsalığı verir, yaralılara isə Allahdan şəfa diləyirəm. Hadisənin miqyası hələ də tam aydınlaşdırılmasa da, təyyarədə olanların vəziyyəti fərqlidir. Bəzi sərnişinlər yüngül xəsarətlərlə xəstəxanaya gətirilib, bir çoxları isə ağır vəziyyətdə intensiv terapiya şöbələrində müalicə olunurlar. Onların vəziyyəti həkimlərin nəzarəti altındadır. Biz hər bir yaralının sağalması üçün dua edirik”.
 
Den.az xəbər verir ki, bunu Aktauda yerləşən Azərbaycan Mərkəzinin direktoru İlkin Orucov deyib.
 
O daha sonra əlavə edib:
 

 
“Qəza yerlərində və xəstəxanalarda olan məlumatları fasiləsiz olaraq hər kəsə, xəstələrin yaxınlarına çatdırırıq. Ən son məlumatları mümkün qədər tez yaymağa çalışırıq. Qazaxıstanın səhiyyə sistemi, səyləri və peşəkarlıqları ilə hadisənin ilk anlarından etibarən  böyük dəstək göstərir. Xüsusilə də qan toplama kampaniyasına Qazaxıstan tərəfinin verdiyi dəstək əvəzsizdir. Qazaxıstan höküməti qanvermə məntəqələrinə gedən taksiləri pulsuz etmişdir ki, bu da insanların qanverməyə gəlməsinə daha rahat kömək edir. Bu humanitar dəstəyə görə Qazaxıstan xalqına və hökümətinə dərin minnətdarlığımızı bildiririk. Azərbaycan diasporası kimi biz bu faciənin ilk anlarından etibarən fəal hərəkətə keçmişik. Qazaxıstanda yaşayan həmvətənlərimiz hadisə haqqında məlumat əldə edən kimi hər cür kömək üçün səfərbər olurlar. Bizim hərəkətlərimiz bir neçə istiqamətdən ibarətdir. İlk növbədə qan toplama kampaniyası, maddi yardım, informasiya dəstəyi və psixoloji dəstəkdir. Bundan əlavə Azərbaycan höküməti tərəfindən xüsusi bir qrup göndərilib ki, bu qrup hadisənin araşdırılmasında və zərərçəkənlərə kömək etməkdə yardımçı olur. Onların iştirakı bizi olduqca ruhlandırır. Aktau şəhərindəki Baş konsulluğumuzun qarşısına insanlar dayanmadan çiçək dəstələri qoyur, başsağlığı verir. Bu həmrəylik və dəstək bizi çox təsirləndirir. Bizim hərəkətlərimiz əsasən birlik, həmrəylik və qarşılıqlı dəstəyə əsaslanır. Bu faciənin acısını birlikdə yaşayır və birlikdə aradan qaldırmağa çalışırıq. Azərbaycan diasporasının bir hissəsi kimi biz qardaşlarımızın yanında olduğumuzu və onlara hər cür dəstək göstərməyə hazır olduğumuzu bildirmək istəyirik”.