İndoneziyada təxminən 724 min dollara başa gələn Pongpet asma körpüsünün açılış mərasimi zamanı təhlükəli hadisə baş verib. Çox sayda insanın eyni anda körpünün üzərinə çıxmasından sonra daşıyıcı troslardan biri birləşmə nöqtəsindən çıxıb və körpü qəfil yana əyilib.
Hadisə Qərbi Yava əyalətinin Panqandaran bölgəsində yerləşən Marqacinta kəndində baş verib.
Təxminən 60 metr uzunluğunda olan Pongpet asma körpüsünün açılışı münasibətilə keçirilən mərasim zamanı rayon rəhbərləri, hərbçilər və sakinlər də daxil olmaqla 50-dən çox insan eyni anda körpünün üzərinə çıxıb.
İnsanlar körpü ilə hərəkət edərkən daşıyıcı troslardan biri əsas birləşmə nöqtəsindən çıxıb. Bundan sonra körpü bir tərəfə doğru əyilməyə başlayıb.
Yaranan panika zamanı bəzi şəxslər körpüdən yıxılaraq yüngül xəsarətlər alıblar.
Hadisədən sonra aparılan yoxlama zamanı körpünün girişində eyni anda maksimum 3 nəfərin və ya bir motosikletin keçməsinə icazə verildiyini göstərən xəbərdarlığın olduğu müəyyən edilib. Körpünün daşıma qabiliyyətinin təxminən 2 ton olduğu bildirilib.
Açılış mərasimində isə körpünün üzərinə bu həddən xeyli artıq sayda insan çıxıb.
Körpünün tikintisinə cavabdeh hərbi birliyin komandiri, polkovnik-leytenant Czi Citra Kurniawan açılış zamanı körpüyə çıxan insanların sayına nəzarət edilməməsinin səhv olduğunu bildirib və üzr istəyib.
Körpünün tamamilə dağılmadığı, əsas daşıyıcı konstruksiyanın yerində qaldığı, problemin isə trosun birləşmə nöqtəsindən çıxması nəticəsində yarandığı qeyd olunub.
Hadisə nəticəsində ölən olmayıb. Körpü təhlükəsizlik məqsədilə müvəqqəti istifadəyə bağlanıb, texniki yoxlama və təmir işlərinə başlanılıb.
Təxminən 724 min dollara başa gələn körpünün elə ilk açılış mərasimində baş verən hadisədən sonra istifadəyə bağlanması İndoneziyada gündəm olub.
