22–24 avqust tarixlərində Türkiyədə keçirilən Master Cup beynəlxalq turnirində Azərbaycan balaca idmançısı böyük nailiyyətə imza atıb.
DenMedia.az xəbər verir ki, dünyanın 28 ölkəsindən 2 minə yaxın idmançının iştirak etdiyi nüfuzlu yarışda həmyerlimiz Abbasov Çingiz həm gücü, həm də istedadı ilə fərqlənib.
Cəmi 6–7 yaş kateqoriyasında mübarizə aparan Çingiz, -22 kq çəki dərəcəsində kumite yarışında bütün rəqiblərinə qalib gələrək 1-ci yerə çıxıb və qızıl medal qazanıb. Bununla yanaşı, o, kata yarışında da yüksək nəticə göstərərək 3-cü yeri tutub və bürünc medala sahib olub.
Beləliklə, Azərbaycan bayrağını qürurla dalğalandıran balaca idmançı həm ustalığı, həm də qələbə əzmi ilə yarışın ən diqqətçəkən simalarından birinə çevrilib.
İdman ictimaiyyəti hesab edir ki, Çingiz Abbasovun bu uğuru həm onun gələcək böyük nailiyyətlərinin, həm də Azərbaycanın gənc idmançı potensialının bariz nümunəsidir.
Kiçik yaşına baxmayaraq beynəlxalq arenada ölkəmizi şərəflə təmsil edən Çingizə gələcək yarışlarda da yeni zəfərlər arzulayırıq!
