ABŞ-ın Ali Məhkəməsi 2025-ci ildə Donald Trampın bir çox ölkənin mallarına tətbiq etdiyi rüsumların qanunsuz olduğunu açıqlayıb. Altı hakim bu mövqeni dəstəkləyib, üçü isə əleyhinə çıxıb.
Məhkəmə bildirib ki, 1977-ci il Beynəlxalq fövqəladə iqtisadi səlahiyyətlər haqqında qanun (IEEPA) prezidentə belə genişmiqyaslı tariflər tətbiq etmək hüququ vermir. Tramp isə ötən il məhz bu qanuna əsaslanaraq rüsumlar tətbiq etmişdi.
Rüsumlardan əldə olunan vəsaitin geri qaytarılıb-qaytarılmayacağı məsələsi aşağı instansiyalı məhkəmələrdə həll olunacaq. Bloomberg-ə görə, ən pis halda ABŞ administrasiyası 170 milyard dollaradək vəsaiti geri ödəməli ola bilər.
Bununla belə, qərar Trampın tarif siyasətini tam dayandırmır. O, məsələn, milli təhlükəsizlik əsaslandırması ilə rüsum tətbiq etmək imkanını saxlayır.
