ABŞ mərkəzli The Washington Post qəzetinin hazırkı və keçmiş yüksək vəzifəli amerikalı rəsmilərə istinadən yaydığı məlumata görə, Tramp administrasiyası İranla aparılan diplomatik təşəbbüslərin zərər görməməsi üçün İsrailin İranın yüksək vəzifəli şəxslərinə qarşı mümkün sui-qəsd planlarından narahatlıq keçirib.
Məlumatda bildirilir ki, ABŞ administrasiyası xüsusilə İranın xarici işlər naziri Abbas Araqçi və parlament sədri Məhəmməd Baqer Qalibafın hədəfə alınmasına qarşı çıxıb. Bu səbəbdən yaz aylarında vasitəçilər üzərindən Tehrana xəbərdarlıq mesajı göndərildiyi iddia olunur.
Adının açıqlanmasını istəməyən amerikalı rəsmi İranlı danışıqlar aparan şəxslərin hədəfə alınmasının diplomatik həll ehtimalını zəiflədəcəyini bildirib.
“Bu şəxsləri öldürsəniz, praqmatistləri də aradan götürmüş olarsınız”, — deyə o qeyd edib.
Qəzetin məlumatına görə, Tramp administrasiyası mart ayından etibarən İsrail rəsmilərinə də İranın siyasi rəhbərliyinə qarşı sui-qəsdlərin davam etdirilməməsi barədə mesaj verib.
ABŞ və İsrail arasında fikir ayrılığı iddiası
Məlumatda yer alan qiymətləndirmələrə əsasən, Vaşinqtonun Tehranı birbaşa xəbərdar etməyə ehtiyac duyması ABŞ və İsrail arasında mövcud fikir ayrılıqlarını üzə çıxarıb.
ABŞ Dövlət Departamentinin keçmiş rəsmisi Aaron David Miller bunun iki ölkənin müharibə hədəflərinin fərqləndiyini göstərdiyini bildirib. O, həmçinin İsrailin baş nazirinin mümkün diplomatik təşəbbüsləri pozmaqda qərarlı göründüyünü iddia edib.
Ağ Ev rəsmilərindən biri isə qəzetə açıqlamasında bildirib ki, “prezident sülh prosesinin işləməsini istəyir”.
Rejim dəyişikliyi hədəfindən imtina edildiyi iddiası
The Washington Post yazır ki, ABŞ və İsrail İranla bağlı hərbi əməliyyatların əvvəlində rejim dəyişikliyi hədəfini bölüşüblər. Lakin amerikalı rəsmilərin Tehrandakı siyasi və hərbi strukturun hakimiyyəti qoruyacağına dair qiymətləndirməsindən sonra tərəflərin məqsədləri fərqlənib.
Məlumatda həmçinin iddia olunur ki, İsrailin martın ortalarında İranın yüksək vəzifəli milli təhlükəsizlik rəsmisi Əli Laricanini öldürməsi Vaşinqtonla Tel-Əviv arasındakı fikir ayrılıqlarını daha da dərinləşdirib.
