İtaliyanın Neapol şəhəri yaxınlığında keçirilən genişmiqyaslı mütəşəkkil cinayətkarlığa qarşı əməliyyat zamanı polis əməkdaşları faktiki olaraq “bank seyfinə” çevrilmiş ev aşkarlayıblar.
Kamorra ilə əlaqəli olduğu bildirilən cinayətkar qrupa qarşı keçirilən əməliyyatda evin divarlarında, döşəmənin altında və mebellərin gizli bölmələrində saxlanılan 3,2 milyon avro nağd pul aşkar edilib. Evdən həmçinin silahlar və 11 ədəd “Rolex” saatı götürülüb.
Hadisə Neapol yaxınlığındakı Kaivano şəhərində baş verib. Polis evin müxtəlif hissələrində xüsusi gizli bölmələr müəyyən edib. Divarlar sökülüb, döşəmə və duş kabininin alt hissəsi yoxlanılıb. Aşkarlanan 50 avroluq əskinasların paketlənərək səliqəli şəkildə gizlədildiyi bildirilib.
Pulun miqdarı o qədər çox olub ki, polis əməkdaşları onu evdən çıxarmaq üçün plastik vedrələrdən istifadə ediblər. Ümumi məbləğin 3,2 milyon avro olduğu açıqlanıb.
Neapolun baş antimafiya prokuroru Nikola Qratteri bildirib ki, hüquq-mühafizə orqanları evdə böyük məbləğdə pulun olduğunu bilsələr də, onun dəqiq harada gizlədildiyini müəyyənləşdirmək üçün geniş axtarış aparmalı olublar.
Əməliyyat zamanı çoxsaylı Kalaşnikov tipli silahlar, tapançalar və 11 “Rolex” saatı da aşkarlanıb. İlkin ehtimala görə, pullar narkotik vasitələrin satışından əldə edilən gəlirlərlə əlaqəli ola bilər.
Əməliyyat çərçivəsində 34 nəfər barəsində tədbir görülüb: 23 nəfər həbs edilib, 11 nəfər isə ev dustaqlığına buraxılıb. Onlar mafioz tipli cinayətkar birlik yaratmaq, narkotik vasitələrin qanunsuz dövriyyəsi və hədə-qorxu ilə tələb etmə kimi cinayətlərdə şübhəli bilinirlər.
