Bakı şəhərində oteldə qumar oyunları təşkilinə görə cəza verilib.
Bakı şəhəri, Binəqədi rayonu, Eldar Babayev küçəsində yerləşən və “Şah” adı ilə tanınan oteldə qumar oyunları təşkil edən şəxslərə cəza verilib.
Den.az xəbər verir ki, əsasən, Qaynarinfo xəbər verir ki, qumar oyunlarının təşkilinə görə otelin sahibi, 1989-cu ildə doğulmuş Xaliq Məmmədsadıqov və orada ofisiant kimi çalışan 1998-ci il təvəllüdlü Hikmət M. və Mirəli D. saxlanılıb. Onlar barəsində Cinayət Məcəlləsinin 244-1.2.1 və 244-1.2.4-cü maddələri əsasında cinayət işi açılıb və məhkəmədə baxılıb.
Təqsirləndirilən şəxslər otel müştərilərinə kart vasitəsilə poker növündə qumar oyunu oynamaları üçün şərait yaratmaqla qumar oyunları təşkil ediblər. Araşdırmalar nəticəsində otelin Namiq və Xaliq Məmmədsadıqov qardaşları tərəfindən idarə olunduğu məlum olub. Otelə əsas nəzarəti Namiq Məmmədsadıqov etsə də, ofisiantların ifadələrinə görə, Xaliq Məmmədsadıqov qumara qarşı olub. Ofisiantlar ifadələrində qumar oyunlarını Namiq Məmmədsadıqovun tapşırığı ilə təşkil etdiklərini bildiriblər.
Onların sözlərinə görə, "Namiq hər dəfə bizə deyirdi ki, onun güclü 'arxası' və tanışları var. Oteldə qumar oynayanlara rahat qulluq edin. Namiq otelin rəhbəri olduğu üçün biz onun bu təklifindən qorxmadıq".
Otel sahibi Namiq Məmmədsadıqov isə ifadəsində “Şah” otelində qumar oyunlarının keçirilməsindən və təşkil edilməsindən xəbərsiz olduğunu və buna icazə vermədiyini bildirib: "Həmin oyunların orada keçirilməsini Hikmət və Mirəli təşkil edib. Özümü qismən təqsirli bilirəm, çünki kollektivimi düzgün seçməmişəm".
Məhkəmə qərarına əsasən, oteldə qumarın təşkilatçısı kimi Hikmət M. 2 il müddətinə azadlıqdan məhrumetmə cəzasına məhkum olunub və məhkəmə iclas zalında həbs edilib. Otelin sahibi Xaliq Məmmədsadıqov və Mirəli D. isə 3 il müddətinə azadlığın məhdudlaşdırılması cəzasına məhkum olunub. Hər iki şəxs cəza çəkdikləri müddətdə üzərilərində elektron nəzarət qolbağı tətbiq edilib.
