Azərbaycanda kuryoz hadisə: Həbsdə olan şəxsə cərimə yazıldı - VİDEO

Cəllabadın Məmmədrzalı kəndinin sakini kuryoz hadisə ilə üzləşib. 

Den.az xəbər verir ki, Dövlətov Dövlət Vəkilağa oğlunun iddiasına görə, həbsdə olduğu halda ona cərimə yazılıb. Üstəlik yığılan cərimə balları nəticəsində sürücülük hüququndan məhrum edilib.

Şikayətçi deyir ki, 2020-2024-cü illərdə Penitensiar Xidmətin 2 saylı Cəzaçəkmə Müəssisəsində cəza çəkib. Lakin 2023-cü ildə adına cərimə yazıldığını öyrənib.  Ən maraqlısı da odur ki, Dövlət Dövlətovun heç vaxt cərimə yazılan "kia optima" markalı avtomobili olmayıb. Eyni zamanda bu markalı avtomobili idarə etmək üçün ona etibarnamə də verilməyib.

Bu halda həbsdə olan bir şəxsə necə cərimə yazıldığı və sürücülük hüququndan məhrum edildiyi maraq doğurur.

Vətəndaş həbsdən azad edildikdən sonra başına gələn kuryoz hadisə ilə bağlı Azərbaycan Respublikası Baş Dövlət Yol Polisi İdarəsinə müraciət etdiyini deyir. Lakin şikayəti ilə bağlı heç bir araşdırma aparılmadığını bildirir.

Dövlət Dövlətov onu da bildiriir ki, ona aid olmayan bir avtomobilə yazılan cərimələr ödənilib. Lakin sürücülük vəsiqəsinə yazılan cərimə balları silinmədiyindən onun sürücülük hüququ əlindən alınıb.

Məsələ ilə bağlı Azərbaycan Respublikası Baş Dövlət Yol Polisi İdarəsindən bildirilib ki, sistemdə Dövlət Dövlətovun adı ən son etibarnamə verilən şəxs kimi görünür. Qanunvericiliyə görə isə, elektron formada tərtib edilən protokollar sonuncu etibarnamə verilən şəxsə tərtib olunur. Vətəndaş avtomobili faktiki idarə edən şəxslə birgə idarəyə yaxınlaşmalı və bundan sonra müvafiq addım atılmalıdır.
[media=]