İran Silahlı Qüvvələri düşmənlərinə qarşı gözlənilməz addımlar atmağa hazırdır.
Tasnim agentliyinin məlumatına görə, bunu İranın müdafiə nazirinin səlahiyyətlərini icra edən Seyid Məcid İbn əl-Rza bildirib.
O qeyd edib ki, hazırda həmin “sürprizlərin” nədən ibarət olduğunu açıqlamaq vaxtı deyil:
“İranlıların biliyi, İran gəncləri və müdafiə sənayesinin nailiyyətləri bizə xoş sürprizlər bəxş edəcək. Hamı, xüsusilə də düşmənlər bilməlidir ki, vaxtı gələndə İranın hazırladığı sürprizlərdən xəbər tutacaqlar”.
İbn əl-Rza həmçinin iddia edib ki, İran döyüş meydanındakı fəaliyyəti ilə regiondakı qüvvələr balansını dəyişib və okeanların o tayından qoşun göndərərək təhdid etmə dövrünün geridə qaldığını göstərib.
Onun sözlərinə görə, mediada səsləndirilən bəyanatlar döyüş meydanındakı vəziyyəti və qalib tərəfi dəyişmir.
İranın müdafiə rəhbəri rəqiblərinə ölkənin çoxəsrlik tarixini öyrənməyi tövsiyə edərək bildirib ki, İran xalqı ilə “hörmət dilində” danışmaq lazımdır.
İbn əl-Rza hazırda İranın müdafiə nazirinin səlahiyyətlərini icra edir. Regionda gərginlik yüksək olaraq qalır və İranla ABŞ arasında qarşıdurma fonunda Tehran son günlər həm hərbi, həm də diplomatik ritorikasını sərtləşdirib.
