Qurban bayramında qidalanma rejiminin dəyişməsi orqanizm üçün əlavə yük yarada bilər. Mütəxəssislər bildirirlər ki, bayram günlərində yalnız süfrədəki yeməklərin tərkibi deyil, yemək saatları və qida qəbulunun tezliyi də dəyişir.
Bayram ziyarətləri, uzun süfrələr və gün ərzində təkrar-təkrar yemək qəbulu həzm sistemini daha çox yükləyir. Bu, sağlam insanlarda belə ağırlıq, köp, halsızlıq və mədə narahatlığı kimi müvəqqəti problemlərə səbəb ola bilər.
Xüsusilə ürək-damar xəstəlikləri, hipertoniya və diabeti olan şəxslər bayram günlərində daha diqqətli olmalıdırlar. Çünki yağlı ət yeməkləri, duzlu qidalar, şirniyyatlar və qeyri-müntəzəm yemək saatları bu şəxslərdə təzyiqin yüksəlməsi, şəkər səviyyəsinin dəyişməsi və ürək-damar sisteminə düşən yükün artması ilə nəticələnə bilər.
Mütəxəssislər Qurban bayramı günlərində porsiyalara nəzarət etməyi, yeməyi tələsmədən qəbul etməyi və gün ərzində həddindən artıq ağır qidalardan uzaq durmağı tövsiyə edirlər. Ətin çox yağlı hissələrindən istifadə etməmək, yeməkləri qızartma əvəzinə qaynadılmış və ya sobada bişirilmiş formada hazırlamaq daha doğru seçim sayılır.
Həkimlər həmçinin yeməkdən dərhal sonra çay və şirniyyat qəbulunu məhdudlaşdırmağı, su içməyi və qısa gəzintilər etməyi məsləhət görürlər. Xroniki xəstəliyi olan şəxslər isə dərmanlarını vaxtında qəbul etməli və qidalanma rejimini birdən-birə dəyişməməlidirlər.
