Stress, alkoqol və bayram süfrəsindəki ağır yeməklər arterial təzyiqə mənfi təsir göstərir. Bu barədə KP.RU-ya müsahibəsində kardioloq, tibb elmləri namizədi, sübuta əsaslanan tibb üzrə ekspert İqnat Rudçenko bildirib. Onun sözlərinə görə, bayram günlərində kardiologiya şöbələrinə müraciət edənlərin sayı nəzərəçarpacaq dərəcədə artır.
“Artan stress, alkoqoldan sui-istifadə və bayram yeməkləri arterial təzyiqin sabitliyini poza bilər — hətta dərmanlarını müntəzəm qəbul edən insanlarda belə. Bu isə ürək-damar xəstəlikləri olan şəxslərdə infarkt və insult riskini artırır”, — deyə Rudçenko qeyd edib.
Kardioloqun sözlərinə görə, Yeni il süfrəsində adətən duzlu və yağlı yeməklər çox olur. Bu cür qidalar orqanizmdə mayenin yığılmasına səbəb olur və təzyiqin yüksəlməsini sürətləndirir. Həkim vurğulayıb ki, bayram günlərində yüksək təzyiq ciddi fəsadlara yol aça bilər.
