Diyetoloqlar Elena Peres və Maria Ernandes Alkala Yeni il süfrəsinə ac qarınla əyləşməyin düzgün olmadığını bildiriblər. Mütəxəssislər bu səhvi bayram günlərində ən çox rast gəlinən problemlərdən biri kimi Hola nəşrinə açıqlamalarında vurğulayıblar.
Onların sözlərinə görə, əgər insan Yeni il gecəsindən əvvəl gün ərzində qida qəbulunu kəskin şəkildə azaldır və ya ümumiyyətlə yemirsə, süfrə arxasında daha sürətli və nəzarətsiz şəkildə yeməyə başlayır. Bu isə həzm problemlərinə, xüsusilə qarında köp, ağırlıq hissi və narahatlığa səbəb olur.
“Günboyu ac qalmaq axşam saatlarında yeməyə qarşı nəzarəti zəiflədir və orqanizm üçün əlavə yük yaradır”, — deyə Elena Peres və Maria Ernandes Alkala qeyd ediblər.
Diyetoloqlar əlavə ediblər ki, ac qalmaq yalnız fiziki deyil, psixoloji fəsadlara da yol aça bilər. Bu hallar arasında narahatlıq hissinin artması, zərərli qidalara güclü meyl və uzunmüddətli perspektivdə sağlam olmayan qida münasibətinin formalaşması yer alır.
“Tövsiyəmiz gün ərzində balanslı qidalanmaqdır. Bu halda axşam yeməyindən zövq almaq və eyni zamanda artıq yeməkdən qaçmaq mümkündür”, — deyə mütəxəssislər vurğulayıblar.
Sağlamlıq mütəxəssislərinin fikrincə, bayram süfrəsindən əvvəl düzgün qidalanma həm həzmi qoruyur, həm də bayramı daha rahat keçirməyə kömək edir.
