Az hərəkətli həyat tərzi bir sıra ginekoloji problemlərə səbəb ola bilər. Bu barədə Life.ru-ya açıqlamasında ginekoloq-endokrinoloq Tatyana Sonina xəbərdarlıq edib.
Həkimin sözlərinə görə, ən çox rast gəlinən problemlərdən biri kiçik çanaq orqanlarında qan durğunluğudur. Uzun müddət oturaq vəziyyətdə qalanda qan dövranı zəifləyir, çanaq dibi və qarın boşluğu əzələləri gərgin vəziyyətdə olur. Bu isə iltihabi prosesləri gücləndirə, ağrılı menstruasiyanı artıraraq kiçik çanaq venalarının varikoz genişlənməsi riskini yüksəldə bilər.
Sonina qeyd edib ki, oturaq iş və hərəkətsizlik maddələr mübadiləsinə də mənfi təsir göstərir və hormonal pozğunluqlara səbəb ola bilər. Aşağı fiziki aktivlik çəki artımına gətirib çıxara bilər ki, bu da qadın sağlamlığı üçün əlavə risk yaradır.
Məsələn, artıq çəki estrogen hormonlarının ifrazını artıra, bu isə bəzi hallarda menstruasiya dövrünün pozulmasına, endometrioz və uşaqlıq miomasının inkişafına yol aça bilər. Bundan başqa, qan dövranının pozulması fertiliteti zəiflədə və hamiləlik planlaşdırarkən çətinliklər yarada bilər.
Həkim riskləri azaltmaq üçün sadə profilaktik tədbirlərə əməl etməyi tövsiyə edib. O, hər 45-60 dəqiqədən bir işə fasilə verməyi, daha çox gəzməyi, qamətə diqqət etməyi və gündəlik rejimə orta intensivlikli fiziki aktivlik əlavə etməyi məsləhət görüb.
Bundan əlavə, Sonina çanaq dibi əzələləri üçün məşqlər etməyi, su rejiminə əməl etməyi və mütəmadi olaraq ginekoloq müayinəsindən keçməyi tövsiyə edib.
