Zəngəzur yalnız bu halda Azərbaycana birləşdirilə bilər - İLGİNC AÇIQLAMA

Erməni politoloq Qarik Keryan hesab edir ki, azərbaycanlı qaçqınlar geri qayıda və Zəngəzur tam olaraq Azərbaycana birləşdirilə bilər. Söhbət Ermənistandan qovulan Qərbi azərbaycanlılardan gedir. Onun bu barədə açıqlaması Ermənistan cəmiyyətində birmənalı qarşılanmayıb və təşvişə səbəb olub.Bəs görəsən, erməni politoloqun fikirlərinin real olma ehtimalı mövcuddurmu?

Mövzunu "Den.az"a şərh edən politoloq Oqtay Qasımov bildirib ki, Ermənistan tərəfindən bu tip açıqlamaların edilməsi daha çox manipulyasiya xarakteri daşıyır: "Ermənistan cəmiyyətində müəyyən əhval-ruhiyyəni formalaşdırmaq üçün bu cür fikirlər səsləndirilir. Bu fikirlərin bir çoxu reallıqdan uzadır.

Təbii ki, tərəflər arasında sülh müqaviləsi istiqamətində aparılan danışıqlarda Qərbi Azərbaycandan qovulan soydaşlarımızın geri qaytarılması ilə bağlı məsələ də gündəmə gətirilib. Rəsmi Bakı bu məsələnin gündəliyə salınmasını istəyir. Bununla bağlı Azərbaycan Prezidentinin də fikirləri mövcuddur. Nəzəri baxımdan bu ehtimal mümkündür. Sözügedən məsələlər həm Brüssel, həm də Moskva formatında müzakirə edilib. Üçtərəfli görüşlərdə həm Şarl Mişel, həm də Sergey Lavrov sözügedən məsələlərə sətiraltı toxunublar. Ermənistan cəmiyyətində hələ o zamandan belə bir fikir yaranıb ki, sülh danışıqlarında Qərbi Azərbaycandan qovulan ən azı 100 min azərbaycanlının geri qaytarılması məsələsi gündəmdədir. Bu, erməni cəmiyyətində xof yaratmaq üçün istifadə olunan bir tezisdir. Təbii ki, nəzəri baxımdan bizim soydaşlarımızın Zəngəzura qayıtması mümkündür. Zəngəzurun Azərbaycana birləşməsi məsələsinə gəlincə, hazırkı şərtlərdə beynəlxalq hüquqa görə, bu, mümkün deyil. Bu, o zaman mümkün ola bilər ki, Azərbaycan tərəfindən Ermənistana qarşı təzminat davası açılsın və beynəlxalq məhkəmələr sözügedən məsələyə baxaraq müvafiq qərar qəbul etsinlər. Çünki işğal dövründə Ermənistan tərəfindən Azərbaycana vurulan zərərin miqdarı 100 milyard dollarlarla ölçülür. Bu maddi zərəri isə Ermənistan ödəyə bilməyəcəyi üçün Zəngəzurun Azərbaycana birləşdirilməsi məsələsi gündəmə gələ bilər. Amma indiki durumda bu, real deyil".

Günəş Fərəh,

Den.az