"Ermənistan və Azərbaycan arasında Zəngəzur məsələsi sülhün əsas problemi olaraq qalır. Azərbaycan və Ermənistan arasında danışıqlarda Zəngəzurdan maneəsiz giriş-çıxışla bağlı məsələ sülh müqaviləsinin bağlanmasını bir müddət təxirə sala bilər. Əgər, Ermənistan rəhbərliyi Azərbaycanın şərtini qəbul edərsə, may ayından gec olmayaraq sülh müqaviləsinin bağalanması mümkündür".
Bu fikirləri "Den.az"a açıqlamasında politoloq Məhəmməd Əsədullazadə səsləndirib. O bildirib ki, ABŞ Azərbaycana qarşı müxtəlif istiqamətlərdə təzyiq etməklə sülh müqaviləsinin məhz öz vasitəçiliyi ilə bağlanmasında maraqlıdır: "Prezident İlham Əliyevin yerli "TV"lərə verdiyi açıqlamada məhz Zəngəzur yoluna maneəsiz giriş-çıxışı sülhün əsas şərti kimi xarakterizə etdi. Zəngəzur dəhlizindən maneəsiz giriş-çıxış olmayacaqsa, Ermənistan və Azərbaycan arasında sülhün əhəmiyyəti yoxdur. Qeyd edim ki, Ermənistan hakimiyyəti Azərbaycana qarşı iki təkliflə sülhü sabotaj edir. Birinci, Zəngəzur yolunda sərhəd və gömrük sisteminin tətbiqi. İkinci, Azərbaycan ordusunun "Güzgü" prinsipi ilə sərhəddən çəkilməsi məsələsidir. Təbii ki, bunlar rəsmi Bakı tərəfindən qəbul edilməyəcək. Ümumiyyətlə, Paşinyan şərtləri yerinə yetirmək əvəzinə şərtlərlə çıxış etdikcə, sülh müqaviləsinin bağlanması vaxt aparacaq. Görünür, Ermənistan rəhbərliyi silahlanmaqla proseslərdə Azərbaycana təzyiq edəcəyini düşünür. Məhz İranla Azərbaycan arasında Naxçıvana çəkilən yolla bağlı şərtlərini Zəngəzurda eyniləşdirmək cəhdi Paşinyanın manipulyasiyasıdır. Ermənistanla Azərbaycan arasında fundamental problemlər o qədər dərindir ki, geosiyasi problemin bir hissəsinə çevrilib. Əgər, Yerevan iki dövlət arasında problemi geosiyasi müstəvidə davam etdirib bununla Azərbaycana təzyiq göstərməyə çalışacaqsa, o zaman sülh müqaviləsinin bağlanması baş tutmayacaq".
Günəş Fərəh,
Den.az
