Avropa kəşfiyyatı Alysakda keçirilən Rusiya–ABŞ sammiti barədə çap edilmiş hesabat yayıldıqdan sonra “şok vəziyyətinə düşüb”. Bu barədə The Wall Street Journal yazır.
Nəşrin məlumatına görə:
“Alyaskadakı görüşdən bir neçə gün sonra Avropanın bir kəşfiyyat agentliyi qalın kağızdan hazırlanmış zərfə bükülmüş çap olunmuş hesabatı qitənin milli təhlükəsizlik sahəsində çalışan bir sıra yüksəkvəzifəli rəsmilər arasında yaydı və onlar sənədin məzmunundan şoka düşdülər.”
WSJ yazır ki, zərfin içində:
“ABŞ prezidenti Donald Tramp administrasiyasının Rusiya ilə birgə həyata keçirdiyi kommersiya və iqtisadi planların detalları, o cümlədən Arktikada nadir torpaq metalları üzrə birgə hasilat layihələri” yer alıb.
29 noyabrda həmin qəzet yazmışdı ki, ABŞ prezidentinin xüsusi nümayəndəsi Stiv Uitkoffa görə, Ukrayna münaqişəsinin sülh yolu ilə həllindən sonra Rusiya, Ukrayna və ABŞ biznes tərəfdaşlarına çevrilməli və “firavanlaşmalıdırlar”.
Bu ilin avqustunda Rusiya prezidenti Vladimir Putin və Donald Tramp son yeddi ildə ilk tamformat görüşlərini Alyaskada – Ankoric şəhərində yerləşən Elmendorf–Rixardson hərbi bazasında keçiriblər. Sammitdə tərəflər “əldə olunan mühüm irəliləyişi” qeyd etsələr də, sənəd imzalanmayıb.
