İranın Milli Təhlükəsizlik Şurasında bildirilib ki, ABŞ İranın uranı zənginləşdirmə hüququnu və İslam Respublikasının Hörmüz boğazı üzərində nəzarətini tanıyıb. Bu barədə Tasnim agentliyi xəbər verir.
Qeyd olunur ki, Vaşinqton Tehrana qarşı sanksiyaları ləğv etməyə hazırdır, bunu İslam Respublikasının Təhlükəsizlik Şurasında vurğulayıblar.
Qeyd edək ki, 8 aprel tarixində İran ABŞ prezidenti Donald Trampın atəşkəs barədə açıqlamasından sonra Ştatlar üzərində qələbə elan edib. İslam Respublikasının dövlət orqanının məlumatına görə, ABŞ ilə iki həftəlik atəşkəs razılaşması Yaxın Şərqdəki bütün bazalardan Amerika qoşunlarının çıxarılmasını, bütün sanksiyaların ləğvini, İranın xaricdə dondurulmuş aktivlərinin azad edilməsini və İrana kompensasiya ödənilməsini nəzərdə tutur.
Bundan əvvəl prezident Tramp İranla iki həftəlik atəşkəs elan edib. Amerika lideri bombardmanları dayandırmağa razılaşıb. Onun sözlərinə görə, bu qərar Pakistanın baş naziri Şahbaz Şərif və ölkənin quru qoşunları qərargah rəisi Asim Munir ilə aparılan danışıqlardan sonra qəbul olunub.
