Hindistanın Odişa ştatında iki başlı körpə dünyaya gəldi.
Bu barədə NDTV telekanalı məlumat yayıb.
Məlumata görə, ilk övladlarını gözləyən ailənin körpəsi hamiləliyin 32-ci həftəsində qeysəriyyə əməliyyatı ilə dünyaya gətirildi.
Yeni doğulan oğlan uşağının iki başı, bir cüt qolu, bir cüt ayağı və vahid sidik-cinsiyyət sistemi var. Həkimlər körpənin daxili orqanlarının quruluşu və mümkün digər anadangəlmə anomaliyalar barədə ətraflı məlumat açıqlamayıblar.
Tibbdə bu vəziyyət “dicephalic parapagus” adlanır və bir bədəndə iki başın olduğu nadir bitişik əkizlik forması hesab edilir.
Hazırda körpə həkim nəzarəti altındadır və ona lazımi tibbi yardım göstərilir. Mütəxəssislər vəziyyətini qiymətləndirmək və növbəti müalicə addımlarını müəyyənləşdirmək üçün müayinələr aparırlar.
“Belə hallarda körpənin sağlamlığı anatomik anomaliyaların xarakterindən, hansı orqanların təsirləndiyindən və doğuşdan sonra yaranan ağırlaşmalardan asılıdır”, – deyə məlumatda qeyd olunur.
