ABŞ Prezidenti Donald Tramp İranla davam edən hərbi-siyasi böhranda yeni hücum dalğası başlatmaq əvəzinə iqtisadi təzyiq və dəniz blokadasına üstünlük verildiyinin siqnalını verib.
Axios-a danışan Tramp İranla münasibətləri “şahmat oyunu”na bənzədib və tərəflər arasında “yarımçıq müzakirə prosesi” getdiyini bildirib.
ABŞ Prezidenti İran iqtisadiyyatının ciddi çətinliklərlə üzləşdiyini iddia edərək, Tehranın yüksək inflyasiya və maliyyə çatışmazlığı yaşadığını deyib. Onun sözlərinə görə, tətbiq edilən dəniz blokadası İran iqtisadiyyatına əlavə təzyiq göstərir.
Tramp həmçinin neft qiymətlərinin bir barel üçün təxminən 75 dollar səviyyəsində qalmasının münaqişənin ABŞ istehlakçılarına təsirini müəyyən qədər azaltdığını bildirib.
Bu arada İran və Oman Hörmüz boğazında təhlükəsiz gəmiçiliyin bərpası ilə bağlı danışıqları davam etdirirlər. İran Xarici İşlər Nazirliyinin məlumatına görə, tərəflər müzakirələrin son mərhələsinə yaxınlaşıb və birgə bəyanatın açıqlanması gözlənilir.
İran Ali Milli Təhlükəsizlik Şurasının katibi Məhəmməd Baqer Zülqədr isə Hörmüz boğazının yenidən açılması üçün ABŞ qarşısında bir sıra şərtlər irəli sürüb.
Tehran ABŞ-nin İran və müttəfiqlərinə qarşı hərbi əməliyyatları dayandırmasını, regiondakı dəniz və hava qüvvələrini geri çəkməsini, son qarşıdurmalarda dəymiş zərərin ödənilməsini, sanksiyaların ləğvini və dondurulmuş aktivlərin sərbəst buraxılmasını tələb edir.
