Əgər öskürək 21 gündən çox davam edirsə, bu, vərəm və ya xərçəng də daxil olmaqla müxtəlif xəstəliklərin əlaməti ola bilər.
Bunu “Gazeta.Ru”ya açıqlamasında Piroqov Universitetinin Rusiya Gerontoloji Elmi-Klinik Mərkəzinin terapevti Yana Fomina bildirib.
Həkimin sözlərinə görə, üç həftə keçməsinə baxmayaraq öskürək dayanmırsa, aptekdən təsadüfi “öskürək dərmanı” almaq əvəzinə terapevtə müraciət etmək lazımdır.
O, belə hallarda flüoroqrafiya, ümumi qan analizi və iltihab göstəricisi olan C-reaktiv zülal analizinin verilməsini tövsiyə edib.
Əgər leykosit və EÇS normaldırsa, orqanizmdə iltihab yoxdur. Yüksəkdirsə, həkim uyğun antibiotik müalicəsi təyin edəcək, — deyə Yana Fomina bildirib.
Həkim qeyd edib ki, rentgen görüntüsündə qaralma aşkarlansa, panikaya düşmək lazım deyil.
Onun sözlərinə görə:
- halların 70 faizində səbəb uzanan pnevmoniya,
- 20 faizində vərəm,
- 10 faizində isə onkoloji xəstəlik olur.
Bununla yanaşı, həkim vurğulayıb ki, xərçəng erkən mərhələdə aşkarlandıqda müalicə edilə bilir.
Öskürəyin səbəbi hər zaman ağciyər olmaya bilər
Yana Fomina bildirib ki, bəzən rentgen nəticələri normal olsa və ağciyərlərdə bronxit və ya pnevmoniyaya xas səslər eşidilməsə belə, öskürək uzun müddət davam edə bilər.
Bu zaman səbəb başqa orqanlarla bağlı olur.
Məsələn:
- rinit və sinusit zamanı yaranan postnazal axıntı,
- mədə turşusunun qida borusuna qayıtması ilə bağlı yaranan qastroezofageal reflüks xəstəliyi (GERX),
- bəzi təzyiq dərmanları
öskürəyə səbəb ola bilər.
Burundan gələn selik boğazın arxa divarı ilə axaraq səs tellərini qıcıqlandırır. Bu halda ağciyəri yox, burnu müalicə etmək lazımdır, — deyə həkim bildirib.
Onun sözlərinə görə, enalapril, lizinopril və perindopril kimi təzyiq dərmanları da quru öskürək yarada bilər.
Bundan əlavə, uzunmüddətli öskürək:
- siqaret çəkmə,
- zərərli istehsalatda işləmək,
- allergiya,
- astma,
- XOBX
kimi səbəblərlə də əlaqəli ola bilər.
