Demensiyadan əziyyət çəkən insanların sayının yaxın onilliklərdə əhəmiyyətli dərəcədə arta biləcəyi proqnozlaşdırılır.
“Scandinavian Journal of Public Health” jurnalında dərc olunan araşdırmada bildirilir ki, buna əsas səbəblər əhalinin yaşlanması və orta ömür müddətinin artmasıdır.
Alimlər 2000–2018-ci illər ərzində 65 yaşdan yuxarı şəxslərin milli tibbi məlumatlarını təhlil edərək 2040-cı ilədək demensiyanın yayılması ilə bağlı bir neçə ssenari hazırlayıblar. Hesablamalarda xəstələnmə və ölüm səviyyəsindəki dəyişikliklər, ömür uzunluğu və uzunmüddətli qulluq müəssisələrinin əlçatanlığı nəzərə alınıb.
Proqnoza əsasən, demensiyadan əziyyət çəkən insanların sayı təxminən 75 faiz arta bilər. Evdə yaşamağa davam edən xəstələrin sayı isə daha sürətlə yüksələ bilər. Uzunmüddətli stasionar qulluq imkanları azalarsa, bu göstəricinin iki dəfədən çox artması ehtimal olunur.
Araşdırma müəllifləri qeyd edirlər ki, yeni demensiya hallarının azalması belə əhalinin yaşlanmasının yaratdığı təsiri tam kompensasiya etməyə bilər.
Tədqiqat Finlandiya məlumatlarına əsaslandığı üçün konkret rəqəmlərin digər ölkələrə birbaşa şamil edilməsi doğru deyil. Bununla belə, nəticələr yaxın onilliklərdə demensiyalı insanlara qulluq ehtiyacının nə qədər arta biləcəyini göstərir.
