Qida rasionundan yağları, o cümlədən bitki və digər yemək yağlarını tamamilə çıxarmaq sağlamlıq üçün təhlükəli ola bilər. Yağlar orqanizmdə bir sıra mühüm proseslərin normal fəaliyyəti üçün zəruridir.
Bu barədə “Yekaterininskaya” klinikasının qastroenteroloqu Darya Lipovaya “Gazeta.Ru” nəşrinə açıqlamasında bildirib.
Onun sözlərinə görə, yağlar hüceyrə membranlarının qurulmasında, hormonların sintezində, bağırsaqların fəaliyyətində və A, D, E, K vitaminlərinin mənimsənilməsində mühüm rol oynayır.
“Yeməkləri çox yağ istifadə etmədən hazırlamaq məntiqli vərdişdir. Lakin yağları qida rasionundan tamamilə çıxarmaq düzgün deyil”, – deyə həkim vurğulayıb.
Mütəxəssis bildirib ki, yağların uzunmüddətli çatışmazlığı dərinin qurumasına, saç tökülməsinə, menstrual dövrün pozulmasına və yağda həll olunan vitaminlərin çatışmazlığına səbəb ola bilər.
Həkim yeməklərin hazırlanması zamanı daha az yağdan istifadə etməyi tövsiyə edib. Bunun üçün qidaları buxarda, qrildə, sobada və ya yapışmayan örtüklü tavalarda bişirmək olar.
Bununla belə, əks göstəriş olmadığı halda gündəlik qidalanmada bitki yağları və digər sağlam yağ mənbələri mütləq yer almalıdır.
Lipovaya öd daşı xəstəliyi, pankreatit və bəzi digər xəstəliklər zamanı yağ qəbulunun müvəqqəti məhdudlaşdırıla biləcəyini də qeyd edib.
“Lakin qidalanmada bu cür dəyişikliklər yalnız həkim tövsiyəsi əsasında edilməlidir”, – deyə qastroenteroloq bildirib.
