Sumqayıtda erkən uşaq inkişafı və məktəbəqədər təhsil sahəsində alternativ model mövzusunda tərbiyəçi-müəllim və valideynlərlə görüş keçirilib-FOTOLAR

Sumqayıt şəhər 40 nömrəli Xüsusi təyinatlı nitqi qüsurlu körpələr evi - uşaq bağçasında Azərbaycanda erkən uşaq inkişafı və məktəbəqədər təhsil sahəsində alternativ model mövzusunda tərbiyəçi-müəllim və valideynlərlə görüş keçirilib.

Bu barədə Den.az-a Abşeron-Xızı Regional Təhsil İdarəsindən məlumat verilib.

Keçirilən görüşdə bildirilib ki, Azərbaycanda uşaqların artıq bir yaşından başlayaraq məktəbəqədər təhsilə cəlb olunması rəsmi şəkildə nəzərdə tutulub.  Hər bir uşaq üçün vacib rol oynayan erkən təhsilin əlçatan olması ilə bağlı çətinliklər infrastruktur maneələrinin mövcud olmasından, həmçinin uşağın inkişafı üçün məktəbəqədər təhsilin əhəmiyyəti barədə valideynlər arasında biliklərin az olmasından ibarətdir. 
Artıq təsdiq olunub ki, uşağın gələcək inkişafının əsas təməli məhz onun erkən yaşlarında təhsili zamanı qoyulur. Azərbaycan Respublikasının Təhsil Nazirliyi məktəbəqədər təhsilin əhatə dairəsini genişləndirmək və məktəbəqədər təhsil müəssisələrində bərabər təhsil imkanları ilə bağlı çatışmazlıqları aradan qaldırmaq məqsədilə, məktəbə hazırlıq səviyyəsinin artırılması və bu cür həlledici əhəmiyyətli erkən təhsil imkanlarına çıxışı olmayan uşaqlara yönəlmiş icma əsaslı erkən təhsil proqramlarının genişləndirilməsi istiqamətində birgə iş aparır.