Ermənistanla sülh müqaviləsinin mətni artıq razılaşdırılıb.
Den.az xəbər verir ki, bu barədə Prezident İlham Əliyev III Şuşa Qlobal Media Forumunun iştirakçıları ilə görüşündə bildirib.
O qeyd edib ki, sülh prosesinin təşəbbüskarı məhz Azərbaycan olub:
"İkinci Qarabağ müharibəsi bitdikdən sonra Minsk qrupu üçlüyü hələ də çalışırdı, Bakıya səfərlər edirdi. Mən gördüm ki, onlar nə edəcəklərini bilmirlər. Mənə sual verəndə, onlara bildirdim ki, biz Ermənistanla sülh sazişi üzərində işləməliyik".
Ölkə başçısı diqqətə çatdırıb ki, o, prosesin başlamasını təklif edib:
"Sülh sazişinin mətnini hazırladıq, Ermənistana göndərdik. Onların müxtəlif şərhləri var idi. İki il ərzində heç bir irəliləyiş yox idi. Bunun başlıca səbəbi o idi ki, Ermənistan tərəfi sülh sazişinin mətninə "Dağlıq Qarabağ" məsələsini daxil etmək istəyirdi. Biz onlara dedik ki, "Dağlıq Qarabağ" sizin təxəyyülünüzdədir, reallıqda mövcud deyil. Bu Azərbaycanın parçasıdır və sülh müqaviləsinin mətninə daxili siyasətimizə aid olan məsələ əlavə edilə bilməz".
Prezident İlham Əliyev vurğulayıb ki, 2023-cü ilin sentyabrında əraziləri azad edəndən sonra yalnız bu zaman Ermənistan israr etmədi, çünki mövzu bağlı idi.
"Real danışıqlar 2024-cü ilin yanvarında başladı. Bizim hazırladığımız mətnin layihəsi üzərində iş getdi və razılaşdırıldı. Ermənistan iki bəndi əlavə etmək istəmirdi. Lakin prezident Donald Tramp seçkidə qalib gələn kimi onlar iki bəndi əlavə etdilər. Ermənistan Konstitusiyasında dəyişiklik və Minsk qrupunun buraxılması - bu iki məsələ həll edilən kimi sülh müqaviləsi imzalana bilər".
