ABŞ Prezidenti Donald Trampın Rusiya Təhlükəsizlik Şurasının sədr müavini Dmitri Medvedyevin bəyanatlarına cavab olaraq iki nüvə sualtı qayığını Rusiya sərhədlərinə göndərməsi beynəlxalq arenada ciddi narahatlıq doğurmuşdur. Bu addım, hər iki tərəfin nüvə qabiliyyətlərini nümayiş etdirmə səyləri ilə əlaqədar olaraq, potensial təhlükəli bir qarşıdurma riskini artırır.
Siyasi və Hüquqi Araşdırmalar Mərkəzinin rəhbəri Xəyal Bəşirov Den.az-a açıqlamasında bildirib ki, Rusiya ilə ABŞ arasındakı münasibətlər tarixən gərgin olub. Bu iki supergüc arasında nüvə müharibəsinin baş verməsi ehtimalı hər zaman dünya üçün böyük bir təhlükə olaraq qalıb. Tramp administrasiyası dövründə ABŞ-ın Rusiya ilə münasibətləri daha da mürəkkəbləşib. Prezident Trampın sərt yanaşması və Medvedevin təhdidləri vəziyyəti daha da ağırlaşdırıb.
Hər iki ölkənin liderləri arasında qarşılıqlı ittihamlar və təhdidlər diplomatik əlaqələrin zədələnməsinə səbəb olub. Bu cür hərbi nümayişlər və bəyanatlar, əslində, müharibəyə hazır olma mesajını verməklə yanaşı, beynəlxalq ictimaiyyəti də qorxu içində saxlayır.
ABŞ və Rusiya arasında birbaşa qarşıdurmanın baş verməsi ehtimalı hər zaman mövcuddur, lakin bu cür qarşıdurmanın ciddi nəticələr doğuracağı və hər iki ölkənin də məruz qalacağı zərərləri nəzərə alaraq, ümumiyyətlə, bu cür münaqişələrdən çəkinilir. Beynəlxalq hüquq və diplomatiya vasitəsilə bu cür gərginliklərin aradan qaldırılması vacibdir.
Nəticə olaraq, ABŞ və Rusiya arasında olan gərginliyin artması, beynəlxalq sistemdə böyük qeyri-sabitlik yarada bilər. Bu səbəbdən, diplomatik yollarla problemi həll etmək üçün səylərin artırılması və hər iki tərəfin daha məsuliyyətli davranması zəruridir.
Ellada Rəsul
Den.az
