Ucar rayonunun Qaracallı kəndində yanğın hadisəsi baş verib.
DenMedia.az xəbər verir ki, hadisə nəticəsində kənd sakini Məmmədov Əliş Əjdər oğluna məxsus iki otaqlı, ümumilikdə təxminən 100 kvadratmetr sahəsi olan yaşayış evi tamamilə yanaraq kül olub.
Məlumata görə, yanğın səhər saat 04:00–05:00 radələrində qeydə alınıb. Ev sahibi Əliş Məmmədov həmin vaxt Göyçay rayonunda yerləşən heyvan bazarına getmək üçün yola düşüb. Onu yola salan həyat yoldaşı isə evə qayıtdıqdan qısa müddət sonra alovu görüb. Qadın xəsarət almadan evdən çıxa bilsə də, mənzil və içərisindəki bütün əşyalar yanaraq istifadəsiz hala düşüb.
Hadisə yerinə Fövqəladə Hallar Nazirliyinin (FHN) əməkdaşları cəlb edilsə də, onların əraziyə gecikməsi səbəbindən ev tamamilə yanıb. Hazırda ailə evsiz qalıb.
Sakinlərin sözlərinə görə, Məmmədovlar ailəsi kasıb vəziyyətdə yaşayır və bu səbəbdən təcili olaraq maddi yardıma ehtiyac duyurlar. Yerli icra strukturlarının və xeyriyyəçilərin ailəyə dəstək göstərməsi zəruri hesab olunur.
Ellada Rəsul
Denmedia.az
