Hərəkətsiz həyat tərzi, qeyri-sağlam qidalanma və xroniki yuxu çatışmazlığı beynin qan dövranının laxtalanma nəticəsində kəskin pozulduğu işemik insult riskini əhəmiyyətli dərəcədə artırır.
Denmedia.az xəbər verir ki, bu barədə damar cərrahı, professor Anahita Dua Daily Mail-ə danışıb.
Həkim risk faktorlarının siyahısında birinci yeri fiziki aktivliyin azlığının tutduğunu bildirib. Belə həyat tərzi qan şəkərinin və yağların artması, “yaxşı” xolesterin səviyyəsinin isə azalması ilə əlaqələndirilir. Nəticədə damar divarları zədələnir, xolesterin lövhəcikləri yaranır və zamanla bu lövhələr damarın mənfəzini bağlaya və ya tromb əmələ gətirə bilər.
Qidalanma da mühüm rol oynayır. Duz, doymuş yağlar və sənaye mənşəli trans-yağlarla zəngin məhsulların (məsələn, marqarin, uzunömürlü şirniyyat, yarımfabrikatlar və fast-food) mütəmadi qəbulu təzyiqi yüksəldir və damar divarlarında iltihab proseslərini sürətləndirir. Duanın sözlərinə görə, bu, damarların qat-qat ayrılmasına və trombların yaranmasına səbəb olur; həmin tromblar beyin damarlarına düşərək insult törədə bilər.
Digər zərərli gündəlik vərdişlərə siqaret çəkmək, xroniki yuxusuzluq və müntəzəm tibbi müayinələri laqeyd yanaşmaq daxildir. Bu amillər iltihab səviyyəsini yüksəldir, təzyiqi qeyri-sabitləşdirir və ürək ritmini pozur, nəticədə damar fəlakətləri riskini daha da artırır.
