Yaşlılıqla əlaqələndirilən xüsusi bədən qoxusu oksidləşdirici stres və hormonal dəyişikliklərlə bağlı ola bilər.
Nutrisioloq Mişel Sends bu qoxunu azaltmağın yollarını Yahooya açıqlayıb.
Sendsin sözlərinə görə, yaş artdıqca orqanizmin antioksidant müdafiəsi zəifləyir, hormon səviyyələri dəyişir və dəri oksidləşdirici stresə qarşı daha həssas olur.
Mütəxəssis bildirib ki, bu proses dəridə bir qədər kifli, yağlı və yüngül bitkiyə bənzər qoxu yarada bilər. Bir çox insan bunu yaşlanma ilə əlaqələndirir.
Onun sözlərinə görə, bu qoxunun pis gigiyena ilə əlaqəsi yoxdur. Səbəb dəridə yaranan və yuyulması çətin olan 2-nonenal adlı maddədir.
Oksidləşdirici stresi azaltmaq üçün Sends həyat tərzini dəyişməyi tövsiyə edib. O, keyfiyyətli yuxu, əzələ kütləsinin artırılması, alkoqol qəbulunun azaldılması, həmçinin antioksidant və polifenollarla zəngin qidaların qəbulunu vacib sayır.
Bu qidalar arasında rəngli giləmeyvələr, yaşıl çay, omeqa-3 yağ turşuları ilə zəngin balıq, eləcə də brokoli və sarımsaq kimi kükürdlə zəngin tərəvəzlər göstərilib.
Mütəxəssis həmçinin rasionda emal olunmuş qidaları, şəkəri və qızardılmış yeməkləri azaltmağı məsləhət görüb.
Bununla yanaşı, Sends xəbərdarlıq edib ki, bədəndə yeni yaranan qoxunu avtomatik olaraq yaşlanmanın qaçılmaz əlaməti kimi qəbul etmək olmaz.
“Bədən qoxusunun qəfil dəyişməsi bəzən maddələr mübadiləsi problemləri və ya xəstəliklərdən xəbər verə bilər. Orqanizm bizimlə daim əlaqə saxlayır və qoxu onun xəbərdarlıq siqnallarından biridir”, deyə mütəxəssis bildirib.
