İran hakimiyyəti ABŞ-ın mümkün yeni hərbi əməliyyatına hazırlaşır. Bu əməliyyatın əvvəlki zərbələrdən daha genişmiqyaslı ola biləcəyi ehtimal edilir.
Bloomberg agentliyinin məlumatına görə, İran rəsmisi bildirib ki, ölkəsi ciddi iqtisadi təzyiqlərə baxmayaraq, mümkün hücuma cavab vermək imkanlarını qoruyub saxlayır.
Mənbənin sözlərinə görə, ABŞ və İran arasında münaqişənin diplomatik yolla həlli istiqamətində səylər hələlik razılaşma ilə nəticələnməyib. Bununla belə, Tehran böhrandan çıxış yollarından biri kimi danışıqları nəzərdən keçirməyə davam edir.
İranda iqtisadi vəziyyət də ağır olaraq qalır. Bloomberg-in məlumatına əsasən, inflyasiya 90 faizə yaxınlaşıb, milli valyuta isə son iki ayda dollar qarşısında dəyərinin təxminən dörddəbirini itirib. Ölkənin neft ixracında da problemlər davam edir.
Gərginliyi artıran əsas məsələlərdən biri Hörmüz boğazındakı vəziyyətdir.
Amerika mediasının məlumatına görə, Pentaqon Yaxın Şərqə üçüncü aviadaşıyıcı zərbə qrupunu və əlavə hərbi qüvvələri göndərməyə hazırlaşır.
ABŞ-ın bölgədə hərbi mövcudluğunu gücləndirməsi dünya enerji bazarına da təsir göstərib. Oktyabrın əvvəlində neft qiymətləri yüksəlib, Brent markalı neftin fyuçersləri ticarət zamanı 4 faizdən çox bahalaşıb.
Bununla yanaşı, diplomatik səylər davam edir. Sentyabrda İran Qətərin vasitəçiliyi ilə ABŞ-a hərbi əməliyyatların dayandırılmasını və Hörmüz boğazının açılmasını nəzərdə tutan təklif göndərib. Təklifə əsasən, bundan sonra tərəflər danışıqlara keçməli idilər.
ABŞ Prezidenti Donald Tramp əvvəlcə bu təklifi rədd etdiyini bildirsə də, sonradan danışıqların davam etdirilməsinin mümkünlüyünü istisna etməyib.
