ABŞ Prezidenti Donald Tramp bildirib ki, Vaşinqtonla Tehran arasında “məhsuldar danışıqlar” aparılır və ABŞ noyabrın 3-də keçiriləcək aralıq seçkilərindən əvvəl İrana hücum etməyəcək.
Tramp bu barədə “Truth Social” hesabında paylaşım edib.
“İran İslam Respublikası ilə məhsuldar danışıqlar aparırıq. ABŞ-də noyabrın 3-də keçiriləcək aralıq seçkilərindən əvvəl İrana hücum etməyəcəyik”, – Tramp bildirib.
ABŞ Prezidenti əlavə edib ki, İrana qarşı tətbiq edilən blokada qüvvədə qalacaq.
Tramp həmçinin Hörmüz boğazından neft daşınmasının “rekord səviyyəyə” çatdığını iddia edib. Onun sözlərinə görə, çərşənbə günü boğazdan 22 milyon barel neft keçib və bunun heç bir bareli İrandan gəlməyib və ya İrana daşınmayıb.
“İran nüvə silahına sahib olmayacaq!” – Tramp vurğulayıb.
ABŞ Prezidentinin açıqlaması Ağ Evin Pentaqondan aralıq seçkilərindən əvvəl İrandakı hədəflərə mümkün zərbələr üçün variantlar hazırlamasını istədiyinə dair KİV-də xəbərlərin yayılmasından sonra verilib.
ABŞ və İsrail fevralın 28-də İrana qarşı hərbi əməliyyatlara başlayıb. Tehran buna regiondakı hədəflərə raket və pilotsuz uçuş aparatları ilə hücumlarla cavab verib. Qarşıdurma nəticəsində qlobal enerji daşımalarının əsas marşrutlarından biri olan Hörmüz boğazında gəmiçilik ciddi şəkildə məhdudlaşıb.
ABŞ və İran iyun ayında Pakistan və Qətərin vasitəçilik səyləri nəticəsində qarşıdurmanı dayandırmaq və danışıqlara yol açmaq məqsədilə memorandum imzalayıblar. Lakin sonradan Hörmüz boğazında təhlükəsizlik və naviqasiya məsələləri də daxil olmaqla bir sıra fikir ayrılıqları səbəbindən razılaşmanın icrası pozulub.
