İsrail Müdafiə Qüvvələrinin yaydığı məlumatda bildirilir ki, müxtəlif ərazilərdə yerləşən 40-dan çox infrastruktur obyekti məhv edilib. Hədəflər arasında komanda mərkəzləri, hərbi obyektlər və digər mövqelər olub.
“Zərbələr nəticəsində “Hizbullah”a məxsus çoxsaylı obyektlər dağıdılıb”, — deyə açıqlamada qeyd olunur.
Eyni zamanda, İsrail tərəfi bildirib ki, Livandan İsrail istiqamətinə yönələn üç şübhəli hava hədəfi sərhədi keçməzdən əvvəl ələ keçirilib, daha sonra isə əlavə pilotsuz uçuş aparatı vurulub. Bundan başqa, İsrailin hava hücumundan müdafiə sistemləri Livanın cənubunda bir hava hədəfini məhv edib.
Lakin Livan mediasının məlumatına görə, İsrailin hava zərbələri nəticəsində Nəbatiyə əl-Fauqa şəhərində iki nəfər həlak olub. Eyni zamanda, Tayri və Haris kəndləri ətrafında hərbi əməliyyatlar və artilleriya atəşləri davam edib.
Digər tərəfdən, Livanın baş naziri Nəvaf Salam bildirib ki, hökumət ölkənin bütün ərazilərində nəzarəti bərpa etmək və münaqişədən zərər çəkmiş bölgələri yenidən qurmaq istiqamətində fəaliyyətini davam etdirəcək.
