Payızda iş yoldaşlarının davranışlarının daha çox əsəb yaratmasının səbəbi gündüz saatlarının azalması və bunun fonunda orqanizmdə baş verən dəyişikliklər ola bilər. Psixoloq Yekaterina Abramova NEWS.ru-ya açıqlamasında bunun səbəblərini izah edib.
Onun sözlərinə görə, günlərin qısalması serotonin səviyyəsinin azalması, melatoninin isə artması ilə müşayiət oluna bilər. Nəticədə yuxululuq və apatiya yaranır, insan ətrafdakıların davranışlarına daha həssas reaksiya verə bilər.
“Bu vəziyyətdə başqalarının vərdişləri, yüksək səslə gülməsi və işdə etdiyi səhvlər hətta şəxsi təhqir kimi qəbul edilə bilər”, – psixoloq bildirib.
Abramova qeyd edib ki, başqa insanın əhvalını və davranışını idarə etmək mümkün deyil. Buna görə də iş yoldaşını dəyişdirməyə və ya onu fərqli davranmağa məcbur etməyə çalışmaq qıcıqlanmanı daha da artıra bilər.
Mütəxəssisin fikrincə, çıxış yolu insanın öz nəzarətində olan məsələlərə diqqət yetirməsidir. Sabit gündəlik rejim, kifayət qədər yuxu, fiziki aktivlik, nahar vaxtı gəzinti və müntəzəm fasilələr emosional tarazlığı qorumağa kömək edə bilər.
Psixoloq əlavə edib ki, artan qıcıqlanma bəzən şəxsi sərhədlərin zəiflədiyinə və gündəlik sabit vərdişlərin olmamasına işarə edə bilər. Gün daha planlı və proqnozlaşdırıla bilən olduqda isə başqalarının davranışları insanı əvvəlki qədər narahat etməyə bilər.
