Həyat boyu stabil münasibətlərə malik olmaq 60 yaşdan sonra daha yaxşı sağlamlıq göstəriciləri və yüksək həyat məmnunluğu ilə əlaqəlidir. Bu qənaətə Avropalı tədqiqatçılar Şimali və Qərbi Avropa ölkələrində 1945–1957-ci illərdə doğulmuş 18 mindən çox insanın məlumatlarını təhlil etdikdən sonra gəliblər. Araşdırma European Journal of Population jurnalında dərc olunub.
Alimlər yalnız hazırkı ailə vəziyyətini deyil, insanın bütün “münasibətlər tarixini” — gənclikdən qocalığa qədər olan dövrü nəzərə alıblar. Onlar bir neçə əsas ssenari ayırıblar: ilk və sabit nikah, boşanma və sonradan yenidən evlənmə, boşanma və yeni münasibətin olmaması, ardıcıl birlikdəyaşayışlar, eləcə də uzunmüddətli tək həyat.
Məlum olub ki, uzun illər davam edən sabit nikahda olan insanlar orta hesabla özlərini daha sağlam hiss edir və həyatlarından daha çox razı qalırlar. Eyni zamanda, təkrar nikah bir çox hallarda boşanmanın mənfi təsirlərini yumşaldır — bu insanların rifah göstəriciləri ömrünü bir nikahda keçirənlərə yaxın olub.
Buna qarşılıq, uzun müddət tək qalmaq və ya boşanıb yeni münasibət qurmamaq daha aşağı subyektiv sağlamlıq və həyat keyfiyyəti ilə əlaqələndirilib.
Tədqiqatçılar təhsil səviyyəsinin roluna da xüsusi diqqət çəkiblər. Daha aşağı təhsil səviyyəsinə malik insanlarda boşanma və yeni münasibətin olmaması rifahın xüsusilə kəskin azalması ilə müşayiət olunub. Bu isə göstərir ki, stabil münasibətlər digər resursların çatışmazlığını qismən kompensasiya edə və yaşlı dövrdə həyat keyfiyyətinin qorunmasında mühüm rol oynaya bilər.
