Tədqiqatçılar müəyyən ediblər ki, hətta gündə cəmi 2–5 siqaret çəkmək belə ürək üçün son dərəcə təhlükəlidir. Bu barədə ABŞ-ın Cons Hopkins Universitetinin Ürək-Damar Xəstəliklərinin Profilaktikası Mərkəzinin alimlərinin 300 mindən çox insanı əhatə edən geniş analizi göstərib. Nəticələr PLOS Medicine jurnalında dərc olunub.
“Yüngül” sayılan siqaret çəkənlərdə ürək çatışmazlığı riski 50%, hər hansı səbəbdən ölüm riski isə 60% daha yüksəkdir.
Araşdırma demək olar ki, 20 il davam edən müşahidələrə söykənir. Alimlər bildirir ki, siqareti tam tərgidənlərdə risk ilk 10 ildə nəzərəçarpacaq dərəcədə azalır, lakin hətta 30 il sonra belə normadan yüksək qalır.
Tədqiqatın diqqətçəkən nəticəsi:
Siqareti azaltmaq effekt vermir — ürəyi qoruyan yeganə yol onu tamamilə tərgitməkdir.
Alimlərin fikrincə, nə qədər erkən dayandırılsa, uzunmüddətli ziyan bir o qədər az olur.
