“Sumqayıtın inkişafında Qərbi azərbaycanlıların rolu” mövzusunda tədbir keçirilib-VİDEO

Sumqayıtın 75 illik yubileyinə həsr olunan “Sumqayıtın inkişafında Qərbi azərbaycanlıların iştirakı” mövzusunda tədbir keçirilib.

Den.az xəbər verir ki, tədbirdə Sumqayıt Şəhər İcra Hakimiyyətinin başçısı Zakir Fərəcov, millət vəkilləri, yerli hüquq-mühafizə orqanlarının rəhbərləri, idarə, müəssisə, təşkilatların nümayəndələri və bu şəhərdə məskunlaşan qərbi azərbaycanlılar iştirak ediblər.

Əvvəlcə şəhidlərin əziz  xatirəsi bir dəqiqəlik sükutla yad olunub, sonra Azərbaycanın Dövlət Himni səsləndirilib. Qərbi Azərbaycan və Sumqayıta dair videoçarxlar nümayiş etdirilib.

Milli Məclisdə yaradılan Qərbi Azərbaycana Qayıdış üzrə Təşəbbüs Qrupunun üzvü, deputat Səbinə Salmanova açılış nitqi ilə çıxış edərək gələn qonaqlara təşəkkür edib. Millət vəkili bildirib ki, bu gün sürətlə inkişaf edən doğma Azərbaycanımızın hər bir guşəsi kimi Sumqayıt da günbəgün gözəlləşir. Sumqayıtda aparılan yenidənqurma və abadlıq işləri şəhərin görkəmini xeyli dəyişib, şəhərimiz dünyanın ən gözəl yerlərindən birinə çevrilib. Sumqayıtın özəlliyi ondadır ki, onun özünəməxsus koloriti var. Sumqayıtda vətənimizin hər bir bölgəsindən insanlar cəmləşib. Burada Azərbaycanımızı dünyada layiqincə təmsil edən, hər birimizin fəxr etdiyi idmançılar, alimlər, filosoflar və digər şəxslər yaşayırlar. Səbinə Salmanova Sumqayıtın inkişafında və tərəqqisində bir çox regionlardan olan insanlar kimi, qərbi azərbaycanlıların da xüsusi rolunun olduğunu diqqətə çatdırıb, Prezident İlham Əliyevin rəhbərliyi altında qərbi azərbaycanlılar tezliklə öz dədə-baba yurdlarına qayıdacaqlarını vurğulayıb.

Daha sonra çıxış edən Milli Məclisin deputatı, Qərbi Azərbaycan İcmasının sədri Əziz Ələkbərli bildirib ki, 1948-1953-cü illərdə qərbi azərbaycanlılar öz yurdlarından deportasiya olunanda onların ilk gəldikləri ünvanlardan biri də məhz Sumqayıt şəhəri olub.

Qərbi Azərbaycan İcmasının Sumqayıt şəhər nümayəndəliyinin sədri Ramiz İsmayılov qərbi azərbaycanlıların Sumqayıtın inkişafındakı rolundan danışaraq fəaliyyətləri üçün gözəl şərait yaradıldığını söyləyib.

Daha sonra Qərbi Azərbaycan İcmasının İdarə Heyətinin üzvü Mahirə Nağıqızı, Milli Məclisin deputatı Tənzilə Rüstəmxanlı, şair Əvəz Mahmud Lələdağ mövzu ilə bağlı çıxışlar ediblər.

Tədbirdə yekun nitqi ilə çıxış edən Sumqayıt Şəhər İcra Hakimiyyətinin başçısı Zakir Fərəcov bildirib ki, bu gün şəhərdə 70 mindən çox keçmiş məcburi köçkün və qərbi azərbaycanlı məskunlaşıb. Prezident İlham Əliyevin qətiyyətli siyasəti nəticəsində həmin vətəndaşlar qısa müddətdə abadlaşdırılan torpaqlarında yaşayacaqlar. İcra başçısı Sumqayıtın ekoloji cəhətdən təmiz şəhərə çevrildiyini, burada böyük abadlıq işlərinin aparıldığını, sakinlərin sosial rifah halının daha da yaxşılaşdırılması üçün addımlar atıldığını diqqətə çatdırıb. Bütün görülən işlərin ölkə başçısı, prezident İlham Əliyevin birbaşa rəhbərliyi ilə həyata keçirildiyini vurğulayıb. Sumqayıtın hər ötən gün daha da müasir bir şəhərə çevrilməsini, dünyanın ən gözəl şəhərləri ilə rəqabətə girməsini ölkə başçısının göstərdiyi xüsusi diqqət və qayğının bariz nümunəsi kimi dəyərləndirib. 

Tədbir incəsənət ustalarının konsert proqramı ilə davam etdirilib.