Abşeron-Xızı Regional Təhsil İdarəsinin təşkilatçılığı ilə, əfsanələrlə zəngin şəhər-Sumqayıtın 75 illik yubleyinə həsr olunan “Əbədi Gənc Sumqayıt” incəsənət- festival musabiqəsinin qalibləri mükafatlandırılıb. 9 nömrəli tam orta məktəbdə təşkil edilən tədbirdə, Sumqayıt şəhər İcra Hakimiyyəti başçısının birinci müavini Teymur Səmədov, Sumqayıt təhsil sektorunun müdiri İman Ağayev, Abşeron-Xızı Regional Təhsil İdarəsinin əməkdaşları, məktəb direktorları və şagirdlər iştirak ediblər. Əvvəlcə məktəbin dəhlizində şagirdlərin əl işlərindən ibarət rəsm sərgisinə baxış keçirilib.
Ölkəmizin ərazi bütövlüyü uğrunda şəhid olanların ruhu bir dəqiqəlik sükütla yad edilib və Azərbaycan Respublikasının Dövlət Himni səsləndirilib. Tədbirin məqsəd və məramı barədə ilkin məlumatlar verilib.
Sumqayıt şəhər İcra Hakimiyyəti başçısının birinci müavini Teymur Səmədov çıxış edərək tədbir iştirakçılarını və şəhər sakinlərini şəhərin 75 illik yubileyi münasibətilə təbrik edib. O, sumqayıtın 75 ildə keçdiyi tarixi yola nəzər salıb, son illərdə görülən işlərdən danışıb. Teymur Səmədov vurğulayıb ki, Prezident İlham Əliyevin diqqəti və qayğısı ilə şəhər İcra Hakimiyyəti başçısı Zakir Fərəcov tərəfinfən həyata keçirilən işlər nəticəsində Sumqayıt inkişaf edib, şəhərdə tamamilə yeni infrastruktur yaranıb. Bu infrastruktur uzun illər sumqayıtlılara ən yüksək standartlar əsasında xidmət edəcək. Bu gün Sumqayıt özünün yeni inkişaf mərhələsini yaşayır. Sumqayıtın bugünkü inkişafı göstərir ki, Heydər Əliyevin arzuları gerçəkləşir, ideyaları reallığa çevrilir. Daha sonra Sumqayıt təhsil sektorunun müdiri İman Ağayev çıxış edərək bildirib ki, şəhərin 75 illik yubleyi münasibəti ilə məktəblərdə çoxsaylı tədbirlər təşkil olunur. Şagirdlər maarifləndirilir. İman Ağayev həmçinin Sumqayıtın şəhər kimi yaranmasından, formalaşmasından və keçdiyi inkişaf yolundan söz açıb. Bildirilib ki, Sumqayıtın ölkə həyatında özünəməxsus yer tutması təkcə onun yaranma tarixi ilə deyil, bütün sahələr kimi təhsil sisteminin inkişafında da özünəməxsus yeri var. Bu şəhəri fərqləndirən əsas cəhətlərdən biri və ən başlıcası burada formalaşan təkrarsız mühitdir. Şəhər hər keçən gün daha da inkişaf edir və gözəlləşir.
Daha sonra şagirdlərin bir birindən maraqlı çıxışlarında, Sum və Ceyranın qovuşması , şəhərin necə qurulması və digər səhələr nümayiş etdirilib. Musiqi və rəqslər hər kəsin könlünü oxşayıb.
Sonda “Əbədi Gənc Sumqayıt” incəsənət- festival musabiqəsinin qaliblərinin mükafatlandırılması mərasimi olub.
