Amerikalı reper Şon Kombs (P. Diddy) insan alveri ittihamı ilə 50 ay müddətinə azadlıqdan məhrum edildikdən sonra daha aşağı təhlükəsizlik səviyyəli və narkomaniya müalicə proqramı olan Nyu-Cersi ştatındakı cəza müəssisəsinə köçürülüb.
DenMedia.az xəbər verir ki, bu barədə məlumatı NBC telekanalı ABŞ Federal Həbsxanalar Bürosunun nümayəndəsinə istinadla yayıb.
Bundan əvvəl 55 yaşlı reper Nyu-Yorkun Bruklin şəhərindəki “Metropoliten” həbs mərkəzində saxlanılırdı. İndi o, Fort-Diks hərbi bazasında yerləşən federal həbsxanaya köçürülüb və cəzasının qalan hissəsini orada çəkəcək.
ABC Newsun məlumatına görə, P. Diddy 2028-ci il mayın 8-də azadlığa çıxmalıdır.
Əgər o, həbsxanada narkomaniya müalicə proqramını uğurla başa vurarsa, cəzası bir il azaldıla bilər.
Xatırladaq ki, oktyabrın əvvəlində reper insanların fahişəlik məqsədilə daşınması ittihamı ilə 4 il 2 ay həbs cəzasına məhkum edilib.
Martın əvvəlində isə ona qarşı dörd qadın tərəfindən seksual zorakılıq iddiası ilə məhkəmə iddiaları qaldırılıb. İddiaçılardan biri, Kendra Haffoni, 2000-ci illərin sonunda VH1 kanalında yayımlanan realiti-şouda iştirak edərkən reper tərəfindən zəhərləndiyini və cinsi hərəkətlərə məcbur edildiyini bildirib.
Digər üç qadın da oxşar zəhərlənmə və zorakılıq halları barədə bəyanat verib.
