Artıq çəkidən qurtulmağın əsas şərti orqanizmin qəbul etdiyindən daha çox kalori sərf etməsidir.
Bu barədə terapevt Svetlana Kanevskaya “Çempionat” nəşrinə açıqlamasında bildirib.
Həkimin sözlərinə görə, çəkinin azalması üçün gündəlik qəbul edilən kalorinin miqdarı sərf olunan enerjidən az olmalıdır. Bu halda orqanizm əvvəlcədən topladığı enerji ehtiyatlarından istifadə etməyə başlayır.
Mütəxəssis vurğulayıb ki, seçilən pəhrizin növü ikinci dərəcəli əhəmiyyət daşıyır. Əsas məqsəd davamlı kalori çatışmazlığı yaratmaqdır. Buna fiziki aktivliyi artırmaqla da nail olmaq mümkündür.
“İlk növbədə piy toxuması enerji mənbəyi kimi istifadə olunur. Lakin düzgün strategiya seçilmədikdə əzələlər də itirilə bilər. Kalori qəbulunun uzun müddət azaldılması nəticəsində orqanizmin enerji sərfiyyatı aşağı düşür. Bədən yeni şəraitə uyğunlaşır, əsas maddələr mübadiləsi və istilik istehsalı azalır, iştaha isə arta bilər. Buna görə də zaman keçdikcə arıqlama sürəti zəifləyir”, – deyə Kanevskaya bildirib.
