ABŞ Hərbi Dəniz Qüvvələri İranla bağlı 64 ticarət gəmisinin hərəkətini dayandırıb və onları istiqamətləndirib. Bu barədə ABŞ Mərkəzi Komandanlığı (CENTCOM) məlumat yayıb.
CENTCOM-un məlumatına görə, 17 avqust vəziyyətinə ABŞ qüvvələri 64 kommersiya gəmisini başqa istiqamətə yönəldib, üç gəmini sıradan çıxarıb və daha iki gəmidə yoxlama aparıb.
ABŞ Hərbi Dəniz Qüvvələri İran limanlarına və sahilyanı ərazilərinə gedən, eləcə də oradan çıxan gəmilərə qarşı dəniz blokadasını iyulun 14-də yenidən tətbiq edib. Bundan əvvəlki blokada rejimi aprelin 13-dən iyunun 18-dək qüvvədə olub.
CENTCOM-un məlumatına görə, əvvəlki iki ay ərzində ABŞ qüvvələri blokadaya əməl edən 142 gəmini başqa istiqamətə yönəldib, tələblərə əməl etməyən 9 gəmini sıradan çıxarıb. Eyni zamanda humanitar yardım daşıyan 50-dən çox kommersiya gəmisinin blokada zonasından keçməsinə icazə verilib.
ABŞ-İran qarşıdurması fonunda Hörmüz boğazında gəmiçiliklə bağlı gərginlik də artır. Reuters-in məlumatına görə, ABŞ blokadanı davam etdirəcəyini bildirərkən İran da boğazda hərbi eskalasiya ehtimalı ilə bağlı xəbərdarlıq edib.
