Şəhid ataları yüksək vəzifəyə seçildi- ÖZƏL

Torpaqlarımızın azadlığı uğrunda canını fəda edən şəhidlərimizin əziz xatirəsi hər zaman dərin hörmətlə yad edilir. Şəhid ailələrinə isə dövlət ərəfindən xüsusi diqqət və qayğı göstərilir. Preziden, Müzəffər Ali Baş komandan İlham Əliyev tərəfindən əsası qoyulan bu tendensiya bütün dövlət qurumları tərəfindən uğurla davam etdirilir.

Hər zaman şəhidlərə və onların ailə üzvlərinə xüsusi ehtiramla yanaşılan Abşeron rayonunda da baş tacımız olan şəhid ailələri və övladları lazımi qayğı ilə əhatə olunub. Rayon İcra Hakimiyyətinin başçısı Abidin Fərzəliyevin şəhid ailələrinə xüsusi diqqət və qayğı ilə yanaşması isə heç kimə sirr deyil.  Elə bunun nəticəsidir ki, Abşeron rayon İcra Hakimiyyəti yanında İctimai Şuranın təşəbbüsü ilə Vətən Müharibəsi iştirakçısı Vidadi Zalovun Saray qəsəbəsindəki evində onun ailə üzvləri ziyarət edilib. Abşeron rayon İcra Hakimiyyəti yanında İctimai Şuranın sədri, şəhid Elçin Həsənlinin anası Xatirə İsmayılova, ictimai şuranın üzvü Zülfiyyə Nuriyeva, şəhid atası Məhərrəm İbadov, "İyirmi Yanvar" İB-nin sədri, İctimai şuranın üzvü Eyşan İsgəndərov şəhid Vidadi Zalovun yenicə Saray bələdiyyəsinə sədr seçilən atası Nizami Zalovu təbrik etmək üçün onun evinə baş çəkiblər.  Masa arxasında əyləşən qonaqlar Azərbaycanın suverenliyi və ərazi bütövlüyü uğrunda canından keçən şəhidlərimizin qəhrəmanlıqlarından, onların cəsarətindən və döyüş əzmindən söz açıblar. Dövlətin şəhid ailələrinə göstərdiyi diqqət və qayğıdan danışan çıxışçılar, buna görə Prezident İlham Əliyevə və birinci vitse-prezident Mehriban xanım Əliyevaya minnətdarlıqlarını bildiriblər. Qeyd olunub ki, ölkəmizin müstəqilliyi və ərazi bütövlüyü uğrunda canını fəda etmiş şəhidlərimizin ailələrinə, sağlamlığını itirmiş qazilərimizə və müharibə iştirakçılarına xüsusi diqqət və qayğı dövlətimizin sosial siyasətinin əsas istiqamətlərindən biridir. Dövlət başçısının tapşırıq və tövsiyələrinə uyğun olaraq Abşeron rayonunda da bu qayğı özünü hərtərəfli şəkildə göstərir. Belə ki, mütəmadi olaraq rayon ərazisində yaşayan şəhid ailələri, qazilər ziyarət olunur, onların sosial problemlərinin həlli istiqamətində addımlar atılır və digər vacib tədbirlər həyata keçirilir. Çıxışçılar Saray qəsəbəsinin yeni bələdiyyə sədri seçilən şəhid Vidadi Zalovun atası, rayon Ağsaqqallar Şurasının sədri Nizami Zalovu təbrik edərək ona yeni fəaliyyətində uğur arzulayıblar. Qeyd edək ki, şəhid Vidadi Zalovun atası Nizami Zalov, eləcə də onun həyat yoldaşı Adilə Zalova Abşeron rayon İcra Hakimiyyətinin rəhbərliyinə, xüsusilə Abşeron rayon İcra Hakimiyyəti yanında İctimai Şuranın sədri, şəhid Elçin Həsənlinin anası Xatirə İsmayılovaya ziyarət və səmimi təbrik üçün təşəkkürlərini bildiriblər. Bu diqqət və qayğının onlar üçün xüsusi əhəmiyyət kəsb etdiyini diqqətə çatdırıblar.

Xatirə İsmayılova və İctimai Şura üzvləri həmçinin şəhid Nurlan Ağakişiyevin atası Etibar Ağakişiyevi yaşadığı Mehdiabad qəsəbəsində ziyarət ediblər. Onu Abşeron rayon Mehdiabad qəsəbə bələdiyyəsinə sədr müavini seçilməsi münasibətilə təbrik ediblər. Xatırladaq ki, şəhid Vidadi Zalov 17 iyul 1985-ci ildə anadan olub. Azərbaycan Ordusunun kiçik çavuşu olan Vidadi Zalov 2020-ci il sentyabrın 27-dən başlanan Vətən müharibəsində iştirak edib. Laçının azadlığı uğrunda gedən döyüşlərdə vuruşaraq fərqlənib. 11 aprel 2023-cü ildə Ermənistan Silahlı Qüvvələrinin Laçın istiqamətindəki təxribatı nəticəsində Vidadi Zalov döyüş tapşırığının yerinə yetirilməsi zamanı şəhid olub. Azərbaycan Prezidenti İlham Əliyevin 25 iyun 2023 tarixli sərəncamına əsasən şəhid Vidadi Zalov “Vətən uğrunda” medalı ilə təltif edilib.