Birinci və İkinci Qarabağ müharibəsi iştirakçısı, şəhid Vüqar Ağayevin xatirə gecəsi keçirilib-VİDEO

2020-ci ilin sentyabr 27-də başlanan Vətən müharibəsində torpaqlarımızın azadlığı uğrunda igidlik göstərən, Azərbaycan Silahlı Qüvvələrinin mayoru, Şəhid, Vətən Müharibəsi Qəhrəmanı Ağayev Vüqar Əhməd oğlunun xatirə gecəsi keçirilib. Abşeron rayon Xırdalan şəhər Mədəniyyət evində təşkil edilən tədbirdə Rayon İcra Hakimiyyətinin başçısı Abdin Fərzəliyev , Şəhidin döyüş yoldaşları, Şəhidlərimizin ailə üzvləri, yaxınları və ictimaiyyət nümayəndələri iştirak ediblər. Əvvəlcə şəhidin keçdiyi döyüş yolundan , göstərdiyi qəhrəmanblıqdan ətraflı bəhs edilib. 
 
Tədbirdə çıxış edən Abşeron RİH başçısı Abdin Fərzəliyev , qeyd etdi ki, Sentyabrın 27-dən başlayan, 44 gün davam edən işğal altındakı torpaqlarımızın azad olunması ilə nəticələnən Vətən Müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrildi. Azərbaycan Silahlı Qüvvələri 44 günlük müharibə zamanı əsl vətənpərvərlik və qəhrəmanlıq göstərmiş, düşmənin canlı qüvvəsini, texnikasını məhv edərək Qələbə qazandı və tarixi ədalət bərpa olundu. Azərbaycan xalqı öz Liderinin- Müzəffər Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi. Prezident İlham Əliyev öz xalqı ilə vəhdətdə olan lider kimi mübarizlik rəmzinə çevrildi. Azərbaycan 30 ilə yaxın davam edən münaqişədə qalib tərəf oldu, ərazi bütövlüyümüz bərpa olundu. Abdin Fərzəliyev vurğuladı ki, Vüqar Ağayev həm birinci, həm də ikinci qarabağ müharibəsində iştirak edərək şəhid olan Vətən müharibəsi qəhrəmanıdır. Şəhid ailələrinə bu gün ölkəmizin hər yerində olduğu kimi, Abşeron rayonunda da xüsusi diqqət və qayğı var. 
 
Daha sonra şəhidin qəhrəmanlığından bəhs edən film nümayiş olundu.
 
Tədbirdə Abşeron-Xızı Regional Mədəniyyət İdarəsinin əməkdaşı, şəhid Əbdülməcid Axundovun anası Ceyran Axundova, Abşeron RİH-I yanında ictimai şuranın sədri , 44 Günlük Vətən müharibəsi şəhidi Elçin Həsənlinin anası Xatirə İsmayılova , şəhidin döyüş yoldaşları və digərləri çıxış edərək bildirdilər ki, Ali Baş Komandan, cənab Prezident İlham Əliyevin rəhbərliyi altında Müzəffər Ordumuzun igidliyi, qəhrəmanlığı sayəsində torpaqlarımız işğaldan azad olundu.  İkinci Qarabağ müharibəsində şəhidlərimiz , qazimiz öz adlarını tarixə yazdılar. Şəhidlərimizin qisası alındı, qanı yerdə qalmadı. Şəhid Vüqar Ağayev anasının çıxışı isə hər kəsi duyğulandırdı. Nənəxanım Ağayeva bütün Şəhid ailələri adından göstərdikləri diqqət və qayğıya görə Ali Baş Komandan Prezident İlham Əliyevə, Birinci vitse-prezident Mehriban xanım Əliyevaya və Abşeron Rayon İcra Hakimiyyətinin başçısı Abdin Fərzəliyevə minnətdarlığını bildirdi. 
 
Tədbir bədii hissə ilə davam etdirildi. 
 
Məlumat üçün bildirək ki, Azərbaycan Respublikası Prezidentinin Sərəncamı ilə mayor Ağayev Vüqar Əhməd oğluna ölümündən sonra “Vətən Müharibəsi Qəhrəmanı" , “Vətən uğrunda”, “Qubadlının azad olunmasına görə” medalları ilə təltif edilib. Qubadlı rayon Xanlıq kənd ümumi orta məktəbinə Vətən müharibəsi Qəhrəmanı  Vüqar Ağayevin adı verilib. Ailəli idi, iki övladı var.