Sumqayıtda "5 Oktyabr Beynəlxalq Müəllimlər Günü" möhtəşəm şəkildə qeyd edilib-VİDEO

Sumqayıtda 5 Oktyabr - Beynəlxalq Müəllimlər Günü münasibətilə tədbir keçirilib.

Tədbirdə Sumqayıt şəhər İcra Hakimiyyətinin başçısı Zakir Fərəcov, Abşeron-Xızı Regional Təhsil İdarəsinin müdiri İlhamə Abdullayeva, idarə, müəssisə və təşkilatların rəhbərləri, təhsil ocaqlarının əməkdaşları, veteran müəllimlər və ictimaiyyət nümayəndələri iştirak edib.

Sumqayıt Muğam Mərkəzində baş tutan tədbirdə Dövlət Himni səsləndirilib, Ümummilli Lİder Heydər Əliyevin və torpaqlarımızın bütövlüyü uğrunda şəhid olanların xatirəsi bir dəqiqəlik sükutla yad edilib.

Tədbirdə çıxış edən Sumqayıt şəhər İcra Hakimiyyətinin başçısı Zakir Fərəcov Beynəlxalq Müəllimlər Günü münasibəti ilə təhsil işçilərini təbrik edərək ölkəmizdə, o cümlədən Sumqayıt şəhərində görülən işlərdən söz açıb. Zakir Fərəcov bildirib ki, Ümummilli Lider Heydər Əliyev daim təhsil işçilərinə böyük diqqət və qayğı ilə yanaşıb. Bu siyasətin Azərbaycan Respublikasının Prezidenti İlham Əliyev tərəfindən uğurla davam etdirildiyini vurğulayan Zakir Fərəcov bildirib ki, ölkədə təhsil sektorunun inkişaf etdirilməsi dövlətin prioritet sahələrindəndir. İcra başçısı qeyd edib ki, Azərbaycanın Birinci vitse-prezidenti Mehriban Əliyevanın rəhbərliyi ilə Heydər Əliyev Fondunun dövlətin bu fəaliyyət proqramına verdiyi dəstək xalqımız tərəfindən böyük rəğbət və sevgi ilə qarşılanır. İcra başçısı vurğulayıb ki, ölkəmizdə təhsil sektorunda həyata keçirilən islahatlar öz müsbət nəticələrini verir və bu sahədə əldə olunan uğurlar bundan sonra da davam edəcək. Qeyd edilib ki, təhsil sahəsində çalışanlarıln sosial durumlarının yaxşılaşdırılması, yeni məktəb və uşaq bağçalarının tikilərək istifadəyə verilməsi, təhsil ocaqlarının maddi-texniki bazasının gücləndirilməsi, təhsil sahəsində aparılan islahatlar şərəfli peşə sahiblərinə göstərilən dövlət qayğısının bariz nümunəsidir.

Daha sonra çıxış edən Abşeron-Xızı Regional Təhsil İdarəsinin müdiri İlhamə Abdullayeva təhsilin inkişafı sahəsində qazanılmış uğurlardan, təhsilin keyfiyyətini yüksəltmək istiqamətində atılan addımlardan, o cümlədən qarşıda duran vəzifələrdən danışıb. O bildirib ki, Azərbaycanda Ulu Öndər Heydər Əliyev tərəfindən müasir təhsil sistemi yaradılıb və hazırda bu sahə Prezident İlham Əliyevin rəhbərliyi ilə özünün ən yüksək inkişaf mərhələsini yaşayır. Ölkədə təhsil işçiləri üçün hər cür şərait yaradılır. Həyata keçirilən təhsil islahatının uğurla başa çatdırılmasında Sumqayıtın pedaqoji kollektivi də yaxından iştirak edir. İlhamə Abdullayeva Müəllimlər Günü münasibətilə bütün pedaqoji kollektivi təbrik edərək onlara gələcək fəaliyyətlərində uğurlar arzulayıb.

Tədbirdə digər çıxış edənlər Sumqayıt təhsilinin keçdiyi inkişaf yolundan, dövlətin bu sahəyə göstərdiyi diqqət və qayğıdan, şəhər məktəblərində təhsil alan şagirdlərin qəbul imtahanlarında və beynəlxalq olimpiadalarda yüksək nəticə göstərərək Sumqayıtın adını uca zirvələrə qaldırmasından söz açıblar.

Daha sonra Sumqayıt şəhər İcra Hakimiyyətinin rəhbərliyi tərəfindən şəhərin təhsil həyatında fərqlənən təhsil işçilərinə Fəxri Fərman və hədiyyələr təqdim olunub.

Tədbir bədii hissə ilə davam etdirilib.

Müəllimlik dünyada ən çətin, eyni zamanda ən şərəfli və ən ğözəl peşədir. Ümumilli Lider Heydər Əliyev dediyi kimi, “Həyatını müəllimliyə həsr edən insanlar həqiqətən fədakar, xalqına, millətinə sədaqətli və eyni zamanda qəhrəmanlıq göstərən insanlardır”. Bu gözəl və şərəfli işin dəyərini bilən əcdadlarımız həmişə müəllimə hörmətlə yanaşıblar. Bu bir faktdır ki, müəllim əməyinin nəticəsində cəmiyyət formalaşır, savadlı, bilikli, geniş dünyagörüşlü, nümunəvi əxlaqa malik insanlar yetişir.