Corat məktəbinin 125 illik yubleyi belə qeyd edildi-VİDEO

Sumqayıt şəhər 7 nömrəli tam orta məktəbin yaranmasının 125 illik yubileyi münasibətilə "Üç Əsrin İşığında" adlı tədbir keçirilib.

Sumqayıt Muğam Mərkəzində baş tutan tədbirdə şəhər İcra Hakimiyyətinin başçısı Zakir Fərəcov, təhsil ictimaiyyətinin nümayəndələri, məktəbin pedaqoji kollektivi və qəsəbə sakinləri iştirak ediblər.

Öncə Torpaqlarımızın azadlığı uğrunda canından keçən şəhidlərimizin və Ulu Öndər, müasir Azərbaycanın qurucusu Heydər Əliyevin əziz xatirəsi bir dəqiqəlik sükutla yad edilib, Azərbaycanın dövlət himni səsləndirilib.

Ardınca Corat kənd 7 nömrəli tam orta məktəbin yaranmasını, keçdiyi inkişaf mərhələsini və uğurlarını əks etdirən video çarx nümayiş olunub.

Tədbirdə çıxış edən 7 nömrəli tam orta məktəbin direktoru Nuranə Hümdbətova Corat qəsəbəsində 125 il öncə fəaliyyətə başlayan təhsil müəssisəsinin böyük inkişaf yolu keçdiyini, məktəbin tədris nailiyyətlərinin son illərdə daha da artdığını diqqətə çatdırıb. Bildirib ki, 7 nömrəli tam orta məktəb Sumqayıtın çoxsaylı təhsil ocaqları arasında ən qədim məktəbdir. Üç əsrin tarixini yaşayan təhsil ocağının hazırkı binası 1990-cı ildə tikilib. Məktəbin məzunları arasında tanınmış, elm, təhsil, incəsənət adamları az olmayıb. Nuranə Humbətova bütün pedaqoji kollektivi yubiley münasibətilə təbrik edib.

Daha sonra çıxış üçün söz Abşeron-Xızı Regional Təhsil İdarəsinin müdiri İlhamə Abdullayevaya verilib. O, məktəbin keçdiyi tarixi inkişaf yolundan və bu gün şəöhərin qabaqcıl təhsil müəssisəsinə çevrilməsindən danışıb. Bildirib ki, məktəbdə sinif otaqları, fənn kabinetləri ən müasir tələblər səviyyəsində qurulub. Şagirdlərin nəzəri biliklərini laboratoriyalarda tətbiq etmələri üçün yeni avadanlıqlar quraşdırılıb. Kompüter otaqları, zəngin kitabxana, məktəbin tarixi guşəsi, tarix muzeyi şagirdlərin ixtiyarına verilib. Bütün bunların nəticəsidir ki, 7 nömrəli tam orta məktəb öz təhsil uğurları ilə digər müəssisələrlə rəqabətə girməyi bacarır. 

Tədbirdə yekun nitqi ilə çıxış edən Sumqayıt şəhər İcra Hakimiyyətinin başçısı Zakir Fərəcov Prezident İlham Əliyevin təhsilə, təhsil işçilərinə göstərdiyi diqqət və qayğının nəticə etibarilə bu sahənin sürətli inkişafı, maddi-texniki bazasının daha da möhkəmlənməsi ilə nəticələndiyini vurğulayıb. Corat məktəbinin şərəfli tarixi inkişaf yolu keçdiyini xatırladan icra başçısı, adıçəkilən müəssisənin Azərbaycan və Sumqayıt təhsilinə böyük töhfə verdiyini diqqətə çatdırıb. Əlamətdar gün münasibəti ilə məktəbin müəllim və şagird kollektivini təbrik edib, onlara bundan sonrakı fəaliyyətlərində daha böyük müvəffəqiyyətlər arzulayıb.

Çıxışlardan sonra məktəbin pedaqoji kollektivinin bir sıra üzvlərinə səmərəli fəaliyyətlərinə görə Sumqayıt şəhər İcra Hakimiyyətinin və Abşeron-Xızı Regional Təhsil İdarəsinin fəxri fərmanları və hədiyyələri təqdim olunub. Eyni zamanda Corat qəsəbə 7 nömrəli tam orta məktəbin direktoru Nuranə Hümbətova Sumqayıt şəhər İcra Hakimiyyətinin başçısı Zakir Fərəcov tərəfindən mükafatlandırılıb.

Yubiley tədbiri Respublikanın tanınmış incəsənət ustalarının konsert proqramı ilə davam etdirilib.