Xaricdən ucuz və sərfəli avtomobil gətirmək adı ilə Tik-tok və İnstagram sosial şəbəkəsində səhifə açdılar və 30-dan çox vətəndaşı aldatdılar. "Kharabağ International Trade" adlı avtomobil şirkəti onların 140 min manata yaxın məbləğdə pullarını mənimsəyib.
Den.az xəbər verir ki, belə bir iddi ilə çıxış edən vətəndaşların sözlərinə görə, sənədlərdə adları keçən 3 tanış, şirkətin rəhbəri Nahid Aslansoy, işçilər Mərdan Məmmdalizadə və Sənan Eminovun dələduzluğu ilə üzləşiblər.
Aldadılan şəxslərin bəziləri artıq hüquq-mühafizə orqanlarına müraciət edib, bəziləri isə hələ də problemin özbaşına həll olunmasını gözləyir. Şikayətçilərin sözlərinə görə, şirkət rəhbərliyi onlara xaricdən yüksək keyfiyyətli avtomobillər gətirəcəkləri vədini verib, lakin nə avtomobillər, nə də pul geri qaytarılıb.
Bildirilib ki, şirkət tərəfindən ən çox istifadə olunan hiylə, vətəndaşlara sərfəli təkliflər təqdim edərək onların pullarını əvvəlcədən almaq olub. Şirkət rəsmiləri müştəriləri xarici ölkələrdən ucuz qiymətə avtomobillər gətirəcəklərinə inandırıb, lakin vəd edilən avtomobillər heç vaxt Azərbaycana gətirilməyib. Adı dələduzluq faktından hallan şəxslərlə əlaqə saxladıq. Şirkətin işçisi olan Sənan Eminov bu işdə günahsız olduğunu hətta pulların şirkət rəhbərliyi tərəfindən alındığını deyir.
"Kharabağ International Trade" adlı avtomobil şirkətinin rəhbəri Nahid Aslansoy isə dostlarının təkidi ilə bu işə girdiyini yalnız o işdən maaş aldığını iddia edib. Vətəndaşlardan pulalrı isə Sənan Eminovun aldığını bildirir.
DİN-in Mətbuat Xidmətinin əməkdaşı Lumu İsrəfilli DenazTv-yə bildirib ki, Vətəndaşların hüquqlarının qorunması və pullarının geri qaytarılması istiqamətində hüquqi prosedurlar davam edir.
“Həmin şirkət tərəfindən xarici ölkələrdən nəqliyyat vasitələri gətirmək adı ilə vətəndaşların aldadılaraq müxtəlif məbləğlərdə pul vəsaitinin ələ keçirilməsi barədə polisə müraciətlər daxil olub. Müraciətlər əsasında polis əməkdaşları tərəfindən araşdırma aparılıb və Cinayət Məcəlləsinin dələduzluq maddəsi ilə cinayət işi açılıb. Həmin şirkətin əməkdaşları barəsində toplanmış materiallar baxılması üçün aidiyyəti üzrə göndərilib.”
Bu hadisə, vətəndaşların diqqətli olmaları və sərfəli təkliflərə aldanmamaları üçün bir xəbərdarlıq olmalıdır. Xaricdən avtomobil gətirmək istəyən şəxslər, yalnız etibarlı və tanınmış şirkətlərlə əməkdaşlıq etməli və əvvəlcədən ödəmələr etməzdən əvvəl şirkətin fəaliyyətini hərtərəfli araşdırmalıdırlar.
