Vitamin kompleksləri və bioloji aktiv qida əlavələrinin həkim nəzarəti olmadan və yüksək dozada qəbulu qaraciyərin toksiki zədələnməsinə səbəb ola bilər.
Bu barədə qastroenteroloq, “Gemotest” laboratoriyasının eksperti Yekaterina Kaşux RT-yə bildirib.
Həkimin sözlərinə görə, risk xüsusilə insanın əvvəlcədən müayinədən keçmədən yüksək dozalı preparatları özbaşına qəbul etməsi zamanı artır.
Potensial təhlükə yarada bilən maddələrdən biri B3 vitamini – niasindir. Mütəxəssis qeyd edib ki, niasinin yüksək dozaları qaraciyər hüceyrələrinə zərər verə bilər.
Bundan başqa, konsentratlaşdırılmış bitki ekstraktları və tərkibində çoxsaylı komponentlər olan əlavələr də risk yarada bilər. Xüsusilə yüksək dozada yaşıl çay ekstraktının qəbulu kəskin toksiki qaraciyər zədələnməsi ilə əlaqələndirilir.
“Bioloji aktiv əlavələr ağır kəskin hepatitə səbəb ola bilər. Bunun fonunda qaraciyərin fəaliyyəti ciddi şəkildə pozula və qaraciyər çatışmazlığı yarana bilər”, – Kaşux bildirib.
Onun sözlərinə görə, ağır hallarda xəstənin təcili qaraciyər transplantasiyasına ehtiyacı yarana bilər. Bəzi bitki mənşəli maddələr orqanizmin qəbul edilən dərmanları emal etməsinə də təsir göstərə bilər.
Qastroenteroloq xüsusilə xroniki qaraciyər xəstəlikləri və maddələr mübadiləsi pozğunluğu olan şəxslərə qida əlavələrini yalnız həkimlə məsləhətləşdikdən sonra qəbul etməyi tövsiyə edib.
Yüksək dozalı vitaminlər təyin olunduqda qaraciyərin vəziyyətini qiymətləndirmək üçün ALT, AST, bilirubin, qamma-GT və qələvi fosfataza kimi biokimyəvi göstəricilərin nəzarətdə saxlanılması lazım gələ bilər.
Mütəxəssis qaraciyərin mümkün zədələnməsinin əlamətləri sırasında davamlı ürəkbulanma, sağ qabırğaaltında ağırlıq hissi, sidiyin tündləşməsi, dərinin və göz ağlarının saralmasını qeyd edib.
Bu əlamətlər ortaya çıxdıqda dərhal tibbi yardım almaq və qəbul edilən bütün vitamin və əlavələr barədə həkimə məlumat vermək tövsiyə olunur.
