Yaşıllıq ərazilərə yaxın yaşamaq demensiya riskinin 20 faiz aşağı olması ilə əlaqələndirilib.
Bu nəticəyə Stokholm Universiteti və Karolinska İnstitutunun alimləri gəliblər. Araşdırmanın nəticələri “Alzheimer's & Dementia” elmi jurnalında dərc olunub.
Tədqiqatçılar Stokholmda yaşayan 60 yaşdan yuxarı 2993 nəfərin sağlamlıq göstəricilərini təhlil ediblər. İştirakçıların vəziyyəti 16 il ərzində izlənilib və bu müddətdə 477 nəfərdə demensiya inkişaf edib.
Alimlər peyk görüntülərindən istifadə edərək iştirakçıların evlərindən 100, 250 və 500 metr məsafədə yerləşən yaşıllıq sahələrini hər il qiymətləndiriblər.
Araşdırma zamanı yaş, təhsil səviyyəsi, həyat tərzi, sosial-iqtisadi şərait, havanın çirklənməsi və nəqliyyat səs-küyü kimi amillər də nəzərə alınıb.
Məlum olub ki, evlərinin 100 metrliyində daha çox yaşıllıq olan insanların demensiyaya tutulma riski 20 faiz aşağı olub.
Yaşıllıq sahələri yaşayış yerindən uzaqlaşdıqca bu əlaqənin zəiflədiyi müəyyən edilib. Nəticələr xüsusilə qadınlar arasında daha nəzərəçarpan olub.
Alimlərin fikrincə, təbiətə yaxın yaşamaq stressi azaltmaq, yuxu keyfiyyətini və psixoloji vəziyyəti yaxşılaşdırmaqla beyin sağlamlığına müsbət təsir göstərə bilər.
Bundan əlavə, yaşıllıq ərazilər insanların daha çox hərəkət etməsinə və sosial ünsiyyət qurmasına şərait yarada bilər.
Tədqiqat müəllifləri vurğulayıblar ki, yalnız böyük parklar deyil, adi ağaclar, yaşıllaşdırılmış həyətlər, bağlar və küçəboyu bitkilər də əhəmiyyət daşıya bilər.
Bununla belə, araşdırma yaşıllığın demensiyanın qarşısını birbaşa aldığını sübut etmir. Nəticələr yaşıllıq ərazilərə yaxın yaşayışla xəstəlik riskinin aşağı olması arasında statistik əlaqəni göstərir.
